|
|
|
 |
|
|
Rubianonan nasé promé ku 1986 ainda ta Antiano!
by NOBO
Posted: Apr 4, 2006 01:51 UTC
|
Insólito pero bèrdat
WILLEMSTAD - Popularmente bisá, e transishon di pais Antia pa Pais Kòrsou lo krea hopi situashon ku no ta aparesé den e guión (draaiboek) ni tin indikashon kon ta bai resolvé e situashonnan aki.
Por ehèmpel e kuestion di ‘nashonalidat’ si por yamé asina pasobra apesar ku nos bira Pais Kòrsou, nos lo keda ku nashonalidat hulandes pero importante ta sá kon tur hende ta keda registrá di akuerdo ku su isla natal.
E kaso di Rubianonan ku a nase promé ku 1986 i ta registrá komo Antiano pasobra no por anulá e hecho ku nan a nase na Antia i riba kualke dokumento ku nan mester firma ora nan registrá nan mes na Hulanda, nan ta registrá nan komo Antiano.
Igual lo bai sosodé mañan ku tur Boneriano i Islaribeño ku a nase den Antia di 5 promé ku 1 yuli 2007 si politikonan logra alkansá e meta pa Kòrsou bira Pais Outonomo riba e fecha menshoná, loke nos ta duda frankamente pero en todo kaso mester apliká e fecha aki den tur preparashon ku ta tumando lugá.
E kaso arubano
Rubianonan ku a nase promé ku 1986 i ke establesé i registrá na Hulanda ta ser registrá komo Antiano te ainda ounke gobiernu di Aruba ke kambia e situashon aki mas rapido posibel.
Esei ta un dje enkargonan dje minister plenipotensiario nobo di Aruba na Hulanda, Frido Croes.
Aruba tin años ta purba kambia registrashon di su hendenan komo Rubiano na lugá di antiano pero no a logra te ainda.
Frido Croes ta kulpa gobiernunan munisipal di Hulanda pe ‘ignoransia’ aki i pe hecho ku nan no ta realisá ku Aruba tin 20 aña kaba ku Status Aparte.
Pero aparte di e hecho ku nan ke pa registrá Rubiano komo tal na Hulanda i no komo antiano, ta importante pa for di e registro por lesa kuantu rubiano tin na Hulanda.
Por sierto ku e minister plenipotensiario mes ta registrá komo Antiano pasobra el
a nase promé ku 1986 tempu ku ainda Aruba tabata forma parti di Antia.
Su dokumentonan ta bisa “geboren in de Nederlandse Antillen” i ta parse Croes ku no mester ta un problema pa registrá un hende di akuerdo ku e isla kaminda ela nase pero den pasaporte nan ta registrá solamente e Pais di nasementu.
E situashon aktual ta ku ta solamente esnan ku a nase despues di 1986 ta rubiano na Hulanda, tur sobrá ta Antiano. Nan ta kalkulá ku tin entre 15 pa 30 mil rubiano na Hulanda pero sigur nan no sá pasobra ta imposibel determiná ta kua di nan a nase promé òf despues di 1986.
Boneriano ku islaribeño
Un situashon similar por surgi despues di 1 yuli 2007 ora Boneiru i Saba haña laso direkto ku Hulanda pasobra tur boneriano i islaribeño ku a nase promé ku e fecha ei ta Antiano.
Òf mester bira asina ku Gobiernu di Reino lo bai di akuerdo pa ora nan saka pasaporte, permiti pa registrá ku nan a nase na Rincon na Boneiru òf The Bottom na Saba.
E unikonan ku ta keda Antiano legitimo despues di 1 yuli 2007 lo ta habitantenan di Statia pasobra nan a opta pa keda den i ku Antia.
|
|
|
|
|
 |
|
|
|
|
Content ©
NOBO 2006 - All Rights Reserved.
You may bookmark this web page, print it or e-mail it to
a friend in accordance with the fair-use provisions of
copyright laws. The material is intended solely for the use
of the individual user.
Archiving, redistribution, or republication of this
material
on other terms, in any medium, requires the express
written permission of the author or publication and the
notification of the editors of CaribSeek News. |
|
|
|
|
|
|
| |
|
