You are here

  • Sharebar

MEP Ta Exigi Pa Escudo Di Aruba Bolbe Bek Den Parlamento

MEP Ta Exigi Pa Escudo Di Aruba Bolbe Bek Den Parlamento
Ningun Hende A Duna Autorisacion Pa Cambia E Escudo Pa E Logo Di Shoco.

ORANJESTAD (MEP) -- Miembronan di fraccion di MEP a reacciona masha desgusta ora a tuma nota cu presidente di parlamento a elimina e escudo oficial di pais Aruba for di den sala di Parlamento.

Pa colmo, a re emplasa esaki cu un logo di un shoco. Esaki ta un falta di respet na nos simbolonan di identidad di nos pais.Ademas, esaki no a wordo aproba den ningun reunion di e comisionnan encarga den Parlamento.

Presidente di parlamento a laga sa cu tur fraccion a bai di acuerdo cu esaki, y cu e no ta compronde e reaccion di lider di MEP. Pero fraccion di MEP mesora a reacciona mustrando un biaha mas cu esaki no ta cuadra. Fraccion di MEP tin un miembro den e comision cu a trata e logo, sr. Chris Romero. E comision tabata tin como tarea pa bin cu un logo cu parlamento por usa riba su letterhead y riba pen y tshirt si e kier parti. Pero NINGUN momento e comision a bin cu algo pa re emplasa e escudo oficial di Aruba den e sala oficial di Parlamento. E mayoria den Parlamento a aproba e diseño di e shoco pa e proposito ey, y lider di MEP, apesar di tin su opinion personal, no a opone, pasobra si e presidente di parlamento kier un dibuho pa copia demas parlamentonan di Reino, y kier cambia e regalitonan cu e ta duna, ta su derecho. Pero hamas ni lider di MEP, ni ningun integrante di MEP por acepta pa re emplasa e escudo oficial di nos pais. Ya caba AVP a cambia color di nos bandera, nan kier falsifica historia, y awor kier cambia nos escudo. Kiko ta sigi, nan kier cambia e himno tambe? Esta infantil!

Hopi hende a chercha di Parlamento pa e motibo aki. Hendenan a kere cu ta un pine apple e ta, otronan a mira e blachinan pa mata di marihuana. Otronan a chercha cu ta headpieces di carnaval a wordo usa den Parlamento. Tur esaki por a wordo evita.

"Tin un diferencia GRANDI ora bo aproba un LOGO pa pone riba letterhead of pen, y ora bo saca e ESCUDO OFICIAL di Aruba for di sala di Parlamento. Esun cu NO ta compronde e diferencia aki, tin un problema hopi serio.E mayoria den Parlamento a scohe e SHOCO como e LOGO di Parlamento, no como ESCUDO, y NINGUN hende a aproba pa elimina e escudo oficial di Aruba. Nos ta exigi pa e escudo original di nos pais wordo poni bek den sala di Parlamento", Evelyn Wever-Croes a duna di conose riba su facebook.