Parlamento a sostene unanimemente e ley di Haven- en Redeverordening

Ministry of Tourism, Transportation and Labour

ORANJESTAD - Dialuna Parlamento di Aruba a trata e ley di Haven- en Redeverordening, presenta pa Minister Otmar Oduber.

Mester bisa cu e reunion a bay den un hopi bon ambiente caminda tabatin un sosten unanime pa cu e ley aki den e sala.
E mandatario a duna di conoce cu e ley aki ta uno hopi importante y cu ta carga sosten den Parlamento amplio pa loke ta trata su introduccion. E ley aki ta uno cu pa mas o menos 1 aña y mey pa dos aña ta bezig cune caminda a percura pa haci un sondeo di kico e situacion ta. A keda demostra cu tin un preocupacion pa loke ta nos awanan teritorial y awor ta amplia e havenverordening cu e redeverordening pa acapara e 12 miya rond di nos isla y asina tin un mihor control y registracion di loke ta sosode den nos awanan teritorial caminda tin diferente tipo di actividadnan tumando lugar constantemente.
Minister Oduber a indica tambe cu ta trata di un ley di un envergadura hopi grandi y a gradici esfuerzonan cu a wordo haci pa logra yega na dje. El a bisa cu e ley aki inicialmente a wordo manda pa Raad van Advies y a wordo manda bek pa Gobierno mirando cu tabatin varios aspecto pa drecha. Asina esfuerzonan grandi a wordo haci di parti Directie Wetgeving, Directie Scheepvaart y asistencia di expertonan di Corsow, como otro expertonan cu a traha riba e ley aki mirando e vision di Gobierno actual, esta di yega na un punto caminda por reglamenta e aspectonan di medio ambiente cu tin un efecto riba nos turismo.
Mas aleu Minister Otmar Oduber a informa Parlamento cu a tuma den consideracion esnan cu pa añanan largo a haci uso di nos awanan teritorial pa por eherce un of mas tipo di negoshi, na Aruba tin diferente companianan cu ta agente di diferente di e barconan aki cu ta keda den nos awanan teritorial. Asina den un forma habri un dialogo inicialmente cu esnan interesa y cu ta haci of participa den e tipo di negoshinan aki, esaki a sosode aproximadamente 5 luna pasa den auditorio di EPI. Tambe tabatin diferente conversacion inoficial cu diferente gruponan y pa otro siman ta bay tin un encuentro cu e persona y companianan aki unda cu ta bay trata e concepto di tarifanan. Ta trata di un decision di Gobierno, pero ta duna participacion pa scucha opinion di esnan envolvi. Compromiso di e mandatario tabata cu promer cu pasa e Lbham cu tarifanan ta bay scucha esnan envolvi y esey ta e motibo tambe pa e reunion di otro siman. Despues di dje, den seno di Gobierno ta bay evalue y stel e vast pa por manda esaki pa wordo acorda.
Akinan Minister Oduber a bisa claramente cu paga no ta e motibo principal pa bin cu un ley asina, sino proteccion di medio ambiente, proteccion di nos entrada principal, pero pa cuida y proteha nos medio ambiente tambe tin su costonan. Pesey ora ta reglamenta tipo di actividadnan asina lo husto mester wordo paga.
Finalizando Minister Otmar Oduber a duna di conoce cu algo importante pa remarca ta cu tin hopi actividad tumando lugar den nos awanan teritorial, actividadnan cu practicamente Aruba no ta na altura di con nan ta sosode. Awor cu e ley aki, conhuntamente cu un protocol cu mester wordo firma cu Guarda Costa ta bay reglamenta e actividadnan aki. El a gradici tur esnan cu a haci e ley aki posibel y tur parlamentario pa e sosten duna pa implemente, ya cu ta e lo contribui na un mihor desaroyo controla di nos pais riba tereno maritimo.

Untitled 1

LIKE Caribseek News on Facebook to participate to WIN an iPad.

Social Sharing
Rate this item
(0 votes)
Filed Under: Aruba

Comment Article: Share Your Thoughts On This Article With Us

Follow Caribseek News On