You are here

  • Sharebar

Nos Ta Sostene Manifestacion Pa Castigo Mas Severo Contra Abuso Di Mucha

Nos Ta Sostene Manifestacion Pa Castigo Mas Severo Contra Abuso Di Mucha

ORANJESTAD (MEP) -- Ya for di aña 2010 un Comicion special di Parlamento di Aruba a sinta cu diferente instancia di Gobierno riba e problematica di Abuso di Mucha na nos Pais.

Di tur e reunionnan a sali un rapport cu algun punto cu mester a keda drecha pa por facilita e trabou di e instancianan envolvi. Hunto cu esaki tabata tin recomendacion tambe pa e parti di programa di concientisacion cu mester tin pa evita e crimen aki contra e inocencia di nos muchanan na nos Pais. Tempo ta pasa y nos no ta mira suficiente mehoracion y ultimamente ora nos tuma nota di e castigonan cu ta wordo duna na e malechornan cu ta comete e atrosidadnan aki contra nos muchanan, esaki ta duna un tristesa profundo. Di nos parti como opocicion nos a traha riba un cambio di ley pa bin cu castigo minimo, pero te dia di awe Gabinete Eman no kier duna su input pa asina e concepto di ley aki por cana su caminda. E Gobierno aki di su banda ta gasta placa den tur cos, menos den locual ta necesario. Pasobra nos mester tene cuenta cu tin biaha setencianan abou ta concescuencia cu den e parti di investigacion y ora di acomula prueba necesario e cosnan no ta bay optimal pa falta di recurso, sea humano, sea material of simplemente di placa. Pero aparte di esaki e parti di concientisacion tambe mester keda haya mas atencion. Locual cu Gobierno ta haci pa concientisacion mester ta mas activo y mester sigi cu e accion di #STOPAWOR di Fundacion Respetami. Banda di esaki nos no mester bagatalisa e importancia di manifestacion pa por crea conciensa serca Pueblo di e gravedad di Abuso di Mucha y pakiko castigonan mas pisa ta na su lugar. Pesey diamars ultimo nos a sostene Fundacion Lisette Gomez den nan manifestacion dilanti Ministerio Publico. Pasobra como hende, como mama, como Parlamentario y como representante di MEP e ta importante pa nos manda e señal cu Abuso di Mucha ta un crimen cu mester wordo severamente castiga.