You are here

  • Sharebar
Ministerio Di Salubridat, Medio Ambiente I Naturalesa Ta Partisipá Ku

Seshon Obligatorio Pa Tur Doño Di Pèrmit Pa Benta Durante Aktividatnan Di Karnaval I Seú 2017 Tabata Eksitoso

Ministerio Di Salubridat, Medio Ambiente I Naturalesa
Seshon Obligatorio Pa Tur Doño Di Pèrmit Pa Benta Durante Aktividatnan Di Karnaval I Seú 2017 Tabata Eksitoso

WILLEMSTAD --  Departamento di Higiena Tékniko i kontròl (THZ) di Asuntunan di Salubridat Públiko UO G&GZ (ántes GGD) a organisá djaweps 8 i djabièrnè 9 di febrüari último seshonnan obligatorio pa tur doño di pèrmit ku ke bende kuminda i bebida ku públiko durante aktividatnan i marchanan di Karnaval i Seú 2017.

E seshonnan tabata na Papiamentu i un total di 77 persona a partisipá.

Personal di e departamentu a tene presentashon i a duna splikashon amplio tokante entre otro higiena di kuminda, higiena personal ora di preparashon i bendementu di alimento, importansia di tin sufisiente awa den stènt pa laba man i ekiponan, kon hasi kompra, stiwá i transportá kos di komé i bebé di forma adekuá, reglanan di stènt, riesgonan si no tene na kuenta ku temperatura di kuminda, kontaminashon krusá di alimento kurú i esun kushiná, splikashon tokante multiplikashon di bakteria, kon kuminda ta daña i vários punto mas di atenshon.

Ku esaki gobièrnu ta kumplí ku e tarea ku e tin pa garantisá nivel i kalidat di preparashon i benta di kuminda i bebida na públiko. Na final di e kurso tur kursista a risibí un sertifikado i ku esaki nan por sigui kana e proseso di petishon serka otro instansianan di gobièrnu pa haña nan pèrmit. Un representante di Ministerio di Desaroyo Ekonómiko tambe tabata presente pa kontestá preguntanan adishonal di e kursistanan.

Direktor di Sektor di Salú interino, sr. C.H.S. Alcala, tambe a hiba palabra i a enfatisá ku ta di sumo importansia pa doñonan di pèrmit mantené nan mes na e reglanan i e informashon ku a keda duná pa por garantisá un bon Karnaval pa un i tur.

Riba e kombinashon di potrèt por mira partisipantenan na e seshonnan di informashon tokante higiena di alimento huntu ku personal di UO G&Gz.