You are here

  • Sharebar
Evelyn Wever-Croes:

Mi Kier Orden Y Respect Bek Den Nos Pais

Mi Kier Orden Y Respect Bek Den Nos Pais
Acusacionnan Serio Di Minister Dowers No Por Keda Asina

ORANJESTAD (MEP) -- Lider di MEP Evelyn Wever-Croes ayera mainta a pidi un audiencia urgente cu Gobernador sr. Alfonso Boekhoudt relaciona cu e acusacionnan serio hasi di parti di minister di husticia Artur Dowers. Na su salida el’a duna e sigiente declaracion.

“Ayera nos a scucha declaracionnan hopi incriminatorio di parti di minister Dowers, y esakinan tur ta graba. Nos a scucha e minister menciona cu un departamento di gobierno ta organisa concierto pa duna hobennan droga. Nos a scucha con e ta splica cu gobierno ta lanta companianan di gobierno pa pone campañadornan traha.

Nos a scucha hopi tiramento di lodo infantil di nan pleito interno, cu mi no ta bai referi na dje mes, pasobra mi ta kere cu nos pais ta pasando den momentonan sumamente dificil, y e tiramento di lodo aki y e pleito interno entre AVP y POR no ta yuda nos pais cu nada.

Pero locual cu e minister a trese padilanti tin nos hopi preocupa, y mas aun ora el’a bisa cu e tin hopi mas cos scondi ainda cu e kier papia di dje. Esey tin nos mas preocupa ainda. Y e declaracionnan aki a laga nos cu hopi mas pregunta, especialmente nos kier sa dicon sr. Mike Eman a permiti tur esaki pasa den su gobierno? Dicon sr. Mike Eman y sr. Arthur Dowers no a para tur e violacionnan di ley y abusonan aki? Y kiko mas sr. Mike Eman y sr. Arthur Dowers tin scondi ainda?

Nos ta hopi preocupa, pasobra tur caminda cu bo bai campaña bo ta tende cuidadanonan ta pidi nos pa trese bek orden y respect. Nos cuidadanonan kier por biba trankil bek. Pero e acusacionnan aki ta trese hopi mas intrankilidad cune. Nos a dicidi di tuma accion, y mientras e partidonan AVP y POR ta sigi den nan pleito, nos kier trese e orden y respect bek.

Pesey awe mi ta aki na Gobernador y pesey awe nos fraccion a pidi un reunion publico cu minister Dowers pa e responsabilisa su mes cu Parlamento pa locual el’a expresa y locual cu e no a bisa ainda. Mi ta duda cu sra. Mervin Wyatt-Ras lo kier ta complice na tur esaki y keda sin yama e reunion. Y mi ta duda cu despues di scucha tanto acusacion serio, e 12 parlamentarionan di AVP kier ta complice na un gobierno cu ta desgracia bida di nos hobennan. Mi ta kere cu sra. Mervin Wyatt-Ras lo yama e reunion dentro di poco.

Mi a pidi Gobernador mesora pa un audiencia urgente, y mi ta hopi agradesido cu mi a haya e audiencia aki mesora, pa mi expresa cu pueblo di Aruba ta exigi pa instancianan encarga cu husticia den nos pais, investiga tur e acusacionnan serio cu e minister di husticia a lansa. Cada un di nan mester wordo investiga a fondo, y nos lo no descansa te mira esaki tuma lugar. Mester investiga tur esnan cu a hasi nan mes culpable na e delitonan, y tambe nan complicenan. Awor cu minister Dowers mes a destapa e crimennan aki, nan no por keda keto mas.

Pesey mi ta aki awe, pasobra mi kier orden y respet bek den nos pais. Mi kier pa nos combati criminalidad y ilegalidad cu man fuerte. Mi no kier pa nos yiunan y nan yiunan crese den un pais den cual un gobierno ta facilita pa nan haya droga. Aruba merece trankilidad, y nos lo trese orden y respect bek” lider di MEP Evelyn Wever-Croes a duna di conose.