You are here

  • Sharebar

Brinda Homenage Na Nos Baluartenan Tin Un Significacion Hopi Especial

Evelyn Wever-Croes (MEP)
Brinda Homenage Na Nos Baluartenan Tin Un Significacion Hopi Especial

STA. CRUZ (MEP) -- Lider di MEP Evelyn Wever-Croes ya desde algun luna ta otorgando reconosemento na baluartenan di partido MEP.

Na lidernan di bario, na caciquenan di partido, na esnan cu a sostene sr. betico Croes y sr. Nelson Oduber.

“Nos a cuminsa anja pasa maart otorgando reconosemento na esnan cu a contribui na nos himno y nos bandera. Na November nos a duna homenage na candidatonan y ex-candidatonan di nos partido. Y dia 24 di januari di e anja aki nos a cuminsa cu e miles di baluarte. Dia 24 di januari nos a otorga 300 reconosemento, y dia 9 di februari, den cuadro di celebracion di 46 anja di existencia di MEP, nos a otorga 50 reconosemento mas.

Awor nos ta preparando pa un grupo grandi di reconosemento pa dia 17 y 18 di maart proximo. Y naturalmente nos lo sigi despues tambe, te ora nos a haya tur hende pa reconose. Ta hopi hende tabata para na fundacion di nos partido, hunto cu Betico Croes y despues cu Nelson Oduber a hasi nos partido grandi. Poco poco nos ta yega na tur. Nos tin un programa pa yega na tur durante e anja 2017. Pasobra semper ta importante pa bo para keto y gradisi esnan cu tabata tin e curashi, y e determinacion pa combati maldad den gobernacion. Tur hende cu a duna su aporte, sea ta den campanja, sea ta door di drenta den politica, sea ta door di yuda cose bandera y verf e emblem di MEP riba e bandera, sea a yuda cu e barco di libertad, sea cuidando Betico y Nel, of cu cualquier otro aporte, ta danki na cada un di nan nos pais awe conose su propio gobierno, su propio parlamento, su propio Banco Central y su propio moneda.

Y ta importante pa nos hobennan mira e ehempel cu nos baluartenan a duna: cu nada por strobe bo di logra bo meta. Nan a kere den e meta cu ta un Aruba cu status autonomo den Reino, y nan a mustra curashi y determinacion. Y ta pesey nos ta duna nan homenage, y sinceramente mi mester bisa cu e homenage aki tin un significacion hopi especial pa esun cu ta ricibi’e, pero mas aun pa ami como e di tres lider di MEP, por otorga nan y gradisi nan”, lider di MEP Evelyn Wever-Croes a duna di conose.