You are here

  • Sharebar
Ministerio Di Salubridat, Medio Ambiente I Naturalesa Ta Partisipá Ku…

FKA Den Koperashon Ku Akademia Di Kuido Di Ambulans Di Hulanda Ta Sigui Ku Plan Di Edukashon Pa Su Personal

Ministerio di Salubridat, Medio Ambiente i Naturalesa
FKA Den Koperashon Ku Akademia Di Kuido Di Ambulans Di Hulanda Ta Sigui Ku Plan Di Edukashon Pa Su Personal

WILLEMSTAD --  Djamars dia 7 di febrüari parti mainta durante un seremonia kòrtiku Minister sra. Zita Jesus-Leito a duna inisio na un kurso den kombinashon ku dosentenan di Akademia di Kuido di Ambulans di Hulanda (AVA) na seis shofùr di Fundashon Kuido di Ambulans Kòrsou (FKA). Alabes huntu ku bestür di FKA, e kursistanan i personal di ambulans a risibí ofisialmente varios material pa kurso i un vehíkulo spesial pa instrukshon den forma di donashon.

Minister Jesus- eito durante su diskurso a enfatisá riba e importansia di konosimentu di e kurso i kon esaki ta relatá na velosidat haltu i e konsekuensianan ku e personal di ambulans mes tin ku atendé tur dia nobo. Minister a deseá e kursistanan hopi éksito i pa nan hasi bon uso di e oportunidat pa e konosimentu i kapasitashon.

E kurso tin durashon di dies luna i ta na enkargo di e dosentenan sr. Ab Schaaphok i sr. Kees van Ravenhorst di Academie voor Ambulancezorg. E kurso ku a inisiá awe ta enserá amplio konosementu i kapasitashon pa maniobrá un ambulans. Ku outorisashon di Kuerpo Polisial ta bai tin dianan ku bou di guia di eksperto e shofùrnan ta praktiká riba kareteranan di Kòrsou ku e vehíkulo di instrukshon spesial hasiendo uso di aparatonan óptiko i instalashonnan di alarma.

Esaki ta kontinuashon di un trayekto di koperashon entre FKA i RAVU. Durante di aña ta bai tin diferente kurso di kapasitashon tantu pa e shofùrnan pero tambe pa e enfermero/a den kuadro di Protokòlnan di Kuido. E shofùrnan después di e kurso di maniobrá ku e vehíkulo ta sigui ku e kurso di asistensia di e  enfermero/a di ambulans. Pa Fundashon Kuido di Ambulans invertí den su personal di kuido di ambulans ta un parti esensial pa duna e mihó servisio na komunidat.