You are here

  • Sharebar

Minister Di Enseñansa Hensley Koeiman A Stipulá Roster Di Fakansi Di Skol Pa Próksimo 3 Aña

Ministerie Van Onderwijs, Wetenschap, Cultuur En Sport
Minister Di Enseñansa Hensley Koeiman A Stipulá Roster Di Fakansi Di Skol Pa Próksimo 3 Aña
Momentu ku Minister Koeiman ta hasi entregá na dekreto ministerial rlashoná ku dia di fakansi na Direktiva di Remi Uní, fotonan ilustrashon di reunion di konsulta.

WILLEMSTAD -- Despues di un konsulta intensivo djaweps último ku representante di tur nuebe direktiva di skol di Kòrsou, Minister di Enseñansa, sr. Hensley Koeiman, djabièrnè último a firma un dekreto ministerial ku ta stipulá e roster di fakansi pa skolnan pa e próksimo tres aña.

En konkreto esaki ta nifiká ku aña eskolar 2017/2018  ta kuminsá riba djaweps 17 di ougùstùs 2017. E promé dia di skol pa aña eskolar 2018/2019  ta dia 15 di ougùstùs 2018 i e promé dia di e aña eskolar 2019/2020 ta 15 ougùstùs 2019. Riba wèpsait di gobièrnu i esun di e diferente direktivanan di skol por tuma nota  di informashon mas detayá di e roster i dianan di fakansi pa kada aña eskolar manera  e dianan di  ‘tussenvakantie’, fakansi di Pasku di Nasementu, dianan liber en konekshon ku karnaval di mucha, Pasku di Resurekshon, fakansi grandi, Dia di Rei, Dia di Labor, Asenshon ets.

Pa asentuá  e importansia di partishon aktivo di mayor den asuntunan di enseñansa i edukashon, djabièrnè 27 di yanüari atardi minister di enseñansa, sr Hensley Koeiman, a efektuá entrega di kopia di e dekretonan ministerial di e roster di fakansi di skol na Kòrsou na sra. Clemy Walle, presidente di e organisashon representativo di komishonnan di mayor huntu ku su komitiva ku tabata konsistí di sra. Denice Bezemer, sra. Mirugia Nowels i sr. Marcel Palm.