You are here

  • Sharebar

Manipulacion Di Rene Herde Ta Sigui, Bisando Cu Gobierno Di AVP A Laga Un Surplus Di 208 Miyon Florin Na 2001

ORANJESTAD (MEP) --  Cada biaha cu e ex-lider di fraccion di AVP Rene Herde skirbi algo riba finansa publico, ta barbaridad so ta resalta den tur su comunicadonan y ta indicativo pakico nos situacion financiero  ta na werki durante e ultimo 7 añanan, ya cu Rene Herde – na lugar di controla e maneho financiero di gobierno – su persona ta tuma tur su tempo pa controla oposicion y sigui defende su gobierno corupto.

Asina nos por a mira con siman pasa un cantidad di barbaridad a ser treci padilanti den medionan di comunicacion, caminda el a presenta un tabel conteniendo e “exploitatierekeningen Land Aruba 2001-2009” y caminda su persona tabata tin e curashi pa di tantisimo vez manipula mente di pueblo bisando entre otro “cu MEP a drenta gobierno na 2001 y a haya un Surplus di 208.2 miyon florin cu gobierno di AVP a laga atras”. Ta increibel con un parlamentario di cabe’i boto por trece asina un gran mentira y nonsens padilanti y kere cu pueblo mester guli e mentira feroz aki.

Finansa Y Turismo Na Werki

Pero ta pesey mes MEP tey pa desbarata tur e ridiculeznan aki di marca mayor cu ta sali for di un mente cu ta biba solamente pa manipula henter un pueblo.  Hecho ta cu e tempo ey na 2001, Gabinete Eman a laga nos pais destrui, na werki financieramente, cu un turismo tambe na werki, cu un debe di mas di 800 miyon florin cu gobierno di MEP mester a paga na e.o. e garantianan hotelero cu a costa 206 miyon dollar, un radar di 23 miyon florin cu nunca a funciona, un proyecto fantasma di Race Track di 50 miyon dollar y e Fondo Desaroyo Nobo San Nicolas di 52 miyon florin.

Sinembargo den su ignorancia Rene Herde no ta comprende cu ora cu bo ta midi e exito of fracaso di e finansa publico di un pais, semper bo ta uza e concepto di Deficit/Surplus financiero y no e barbaridad cu Rene Herde a trece padilanti di exploitatierekeningen cu ta algo completamente diferente. Si Rene Herde a haci su huiswerk drechi, e mes lo por a ripara cu tur instancia local y internacional manera Banco Central, IMF, Fitch, Standard & Poor’s den nan rapportnan ta papia solamente di Deficit/Surplus financiero y cu na tur pais na mundo esaki ta asina. Pero ta e sabio di Rene Herde so mester bin manipula mente di pueblo cu su gobierno di AVP a registra segun e exploitatierekeningen (?) un suma di 208 miyon florin di surplus (?) na 2001.  Aki Rene Herde ta hinca cacho y pushi den e mesun haula!

Realidad Tristo Y Amargo

E pregunta di MEP ta, pakico Rene Herde no a presenta e otro cifranan di exploitatierekeningen di 2010 te cu 2015, pues bao di su propio gobierno di AVP y caminda a registra exploitatietekorten hamas bisto di mas cu 330 miyon florin den un solo aña? Pakico a tene e cifranan aki scondi pa pueblo? Ta pesey mes MEP no ta bay tras di e locura y barbaridadnan di Rene Herde y un biaha mas ta presenta na pueblo un tabel den cual por mira realmente kico e gastonan, deficitnan y debenan tabata na 2010 te cu 2015 bao di gobernacion di AVP. Esaki ta e realidad tristo y amargo cu Rene Herde y AVP mester biba cu ne, ya cu ta hustamente e gobierno di AVP mes NO a cumpli cu e norma di e blafon cu nan a stipula di 1350 miyon di gastonan, NO a cumpli cu e reduccion di deficit cu 75 miyon florin tur aña y NO a baha e debe nacional pero a aumenta esaki te na 4 biyon florin. Alavez den e grafico adhunto por mira cu nos debe nacional lo sigui aumenta na 2016 te na 2018 (mas di 4.2 biyon florin) y cu ora tur e proyectonan PPP finalisa na 2018 y cu nan tin cu cuminsa wordo paga, nos debe nacional lo sigui aumenta mas y mas den e añanan siguiente.

Ta Rene Herde so ta keda biba di e ilusion cu su gobierno a haci un bon trabao durante e ultimo 7 añanan y cu nos pais ta prosperando, siendo cu tur dato financiero ta mustra den ki estado AVP lo laga nos pais na final di 2017.