You are here

  • Sharebar

Habitantenan Di Kiviti Ta Satisfecho Cu Cas Di FCCA Y Atencion Di Gobierno

Habitantenan Di Kiviti Ta Satisfecho Cu Cas Di FCCA Y Atencion Di Gobierno

ORANJESTAD -- Algun habitante di e compleho di vivienda pa comunidad di FCCA ubica na Kiviti, a presencia e ceremonia di ponemento di prome piedra pa loke ta su ampliacion.

Un di nan ta sra. Swinda Giel, kende ta residencia na e bario ya pa casi cinco aña. Sra. Giel ta contento cu su cas y e bario, e ta bisa cu: “ta bayendo bon. Nos tin un dushi bario, sin problema.”

Pesey mes, e ta spera cu FCCA lo mantene asina tambe. E ta contento cu mas hende lo haya oportunidad di tin nan propio cas pagabel, sin embargo ta spera cu e bisiñanan nobo lo tene cuenta cu ta biba banda di Bejaardentehuis y cu e bario ta uno keto caminda tur hende ta coopera cu otro.

Otro aspecto cu sra. Giel ta contento cu ne ta e atencion cu ta haya di parti di Gobierno, specialmente di Prome Minister Mike Eman. Algun tempo atras e mandatario tabata den bario, canando y bishitando casnan como parti di su Accion di Bario. Di e tempo ey a tuma nota di e necesidad pa luz publico. Mientras cu e proceso ey ta canando y e proyecto di Luz den Bario ya ta pariba di brug, e biaha aki e bisiñanan tabatin oportunidad pa hacie otro peticion.

Sra. Giel y otro habitantenan ta haya importante pa instala verkeersplateau. Esaki ta relacion cu e hendenan grandi cu ta biba den e bario y e manera con automobilistanan ta transita cu velocidad halto den e cayanan. Premier Eman a dirigi e peticion di e ciudadanonan inmediatamente pa representantenan di DOW cu tabata presente na e ceremonia.

Tur esaki ta pone cu sra. Giel ta masha satisfecho. No solamente cu e atencion cu Prome Minister Eman ta duna na e bario, pero tambe cu e maneho di FCCA. “Mi no tin nada di keha, nos ta biba bon,” el a bisa. “Un bes pa aña FCCA ta pasa controla. Nos ta geef door tur nos commentario y nan ta cumpli cu nos.”