You are here

  • Sharebar
Compara Cu Facilidadnan Anterior Di Hulpbestuurskantoornan

MFA Noord Ta Ofrece Un Servicio Optimal Den Un Ambiente Agradabel

MFA Noord Ta Ofrece Un Servicio Optimal Den Un Ambiente Agradabel
Meta Di Servicio Di 5 Strea Den Vision Di Gabinete Mike Eman Ta Un Realidad Cu MFA Noord

ORANJESTAD -- Edificio di MFA (Facilidad Multifuncional) Noord ta percura pa servicionan importante ta mas cerca di e ciudadano.

Tambe e ta un luga adecua y placentero pa clientenan debi na di e variedad di instancia, departamento y companianan cu ta ofrece nan servicionan for di e edificio multifuncional aki na Noord. Mientras cu e manehadonan ta enfoka riba un servicio di calidad, MFA Noord ta un luga di trabou tambe sumamente efectivo, eficiente y adecua pa e trahadonan cu ta duna servicio na nan districto.

MFA Noord ta e prome edificio multifuncional na Aruba y ta den servicio desde juli 2015.

Segun Richard Tromp, Manager di e MFA, e servicio cu ta wordo brinda for di e sitio aki ta un diferencia grandi for di loke e clientenan tabata custumbra tempo cu nan tabata bishita Hulpbestuurskantoor (HBK) di Noord den pasado. Un di e metanan importante di Gabinete Mike Eman, tempo cu a cuminsa cu e proyecto, tabata cu banda di ofrece un miho servicio den un acomodacion placentero, ta importante pa e facilidad por fungi tambe como un punto di encuentro den e districto, segun Tromp, y el agrega cu, "e facilidad a bira esey tambe".

Tromp a agrega cu antes e edificio di HBK Noord tabata uno hopi chikito pa e necesidadnan di e comunidad di Noord y bisindario. Consecuentemente no unicamente e empleadonan tabata traha den un area limita, pero e clientenan tampoco tabatin caminda adecuado pa sinta warda nan turno prome wordo atendi.

E cambio cu por mira y sinti den MFA Noord awendia, compara cu HBK di antes, ta grandi. Tin hopi mas espacio y e luga ta placentero. Esnan cu ta acudi pa, por ehempel servicio di censo, tin area tur rond pa sinta, di un forma comodo, mientras cu nan ta warda nan beurt. E number ta wordo yama via di speaker y nan por scucha esaki unda cu nan ta sinta den e edificio. “Mientras cu e cliente ta spera, e por sinta lesa un buki, combersa cu otro bishitantenan, of por bebe of come algo den e cafetaria cu tin na entrada di e edificio.” Ademas di hopi luga pa sinta, Tromp a sigui splica, e balinan tambe ta mas espacioso y mas comodo pa e cliente por comunica cu e funcionario riba e servicio cu e ta desea.

Edificio MFA Noord ta hopi moderno, cu panelnan solar cu ta percura pa e edificio ta practicamente produci loke e ta uza. Den e MFA tur caminda tin Wi-Fi disponibel pa e bishitantenan. “Tur esaki ta haci cu e tempo di warda riba servicio a bira hopi mas agradabel,” Richard Tromp a comenta.

Ademas di e Oficina Auxiliar di Gobierno, otro servicionan cu ta wordo duna den e edificio ta laboratorio di MedLab, SIAD, departmento di impuesto y PsyCoach cu ta un servicio di Psychologia, tambe tin mashin di bancomatico di Aruba Bank.

Edificionan MFA di Noord ta e prome den un serie di facilidadnan cu ta bay inclui e hulpbestuurskantoornan di cada districto. Construccion di MFA Paradera ta den su fase final, mientras cu na Savaneta construccion ta basta avansa. MFA St. Cruz na e momentonan aki ta preparando pa cuminsa cu construccion y renobacion di e edificio na San Nicolas ta den fase planning. MFA Dakota na e momentonan aki tambe ta den fase di planning.

Na tur MFA tin espacio disponibel unda cu organisacionnan di bario por tene nan eventonan social, cultural of reunionnan den nan espacionan multi-funcional. Na Noord mester tuma contacto cu Richard Tromp manager di MFA Noord, pa mas informacion tocante di e servicionan aki.