You are here

  • Sharebar

Si All-Inclusive Ta Malo Pa Aruba, Dicon Otmar Oduber Ta Habri Caminda Pa 1500 Kamber All-Inclusive Mas?

Evelyn Wever-Croes (MEP)
Si All-Inclusive Ta Malo Pa Aruba, Dicon Otmar Oduber Ta Habri Caminda Pa 1500 Kamber All-Inclusive Mas?

ORANJESTAD (MEP) -- Parlamento diabierna a cuminsa cu tratamento di e ley pa regula all-inclusive. Lider di MEP-Evelyn Wever-Croes a urgi e minister pa tuma su tempo pa prepara e ley mihor.

“Tin consensus cu nos no kier lanta un dia y mira tur hotel na Aruba a bira all-inclusive. Sinembargo tin consensus tambe, cu e ley nos dilanti, NO ta e caminda corecto pa hasie. Primeramente pasobra no tin un estudio debido hasi tocante all-inclusive na Aruba, pero tambe pasobra e minister a scohe un caminda y un bachi huridico cu no ta corecto. Pero principalmente, pasobra den e ley cu minister a manda Parlamento, e no ta frena e all-inclusive, sino e ta duna espacio pa 1500 kamber all-inclusive mas. Si all-inclusive ta malo, manera e minister ta bisa, e ora dicon permiti 1500 kamber all-inclusive mas?

Rapport Di PWC

Minister a laga traha un rapport pa PWC Merca y a paga US$ 250.000 pa esaki. E rapport ta existi pero Minister no a gusta su conclusion, y pesey e no kier duna Parlamento e rapport. Pero nos a haya si e conclusion di PWC den letranan chikito di un synopsis cu tambe PWC a traha y cu e minister a duna Parlamento. Y den e synopsis di PWC ta para riba pag 19 cu PWC a hasi un otro studio na all-inclusive di Aruba y a yega na e conclusion: “it might be advisable to embrace the all-incusive concept”. PWC ta yega na e conclusion aki a mirando cu Aruba tin un ‘mapa’ amplio di e modelo all-inclusive na Aruba. Tambe cu e momentum cu tin actual den cual hopi turista ta scohe pa all-inclusive. Segun PWC tin fondonan di inversion disponible, y mirando cu tin e  posibilidad cu hotelnan all-inclusive di marca kier bin Aruba, nan ta recomenda pa Aruba brasa e modelo y continua cun’e. Nos lo kier haya e rapport completo pa sa a base di kiko PWC ta yega na e conclusion aki, pero lamentablemente e minister no kier duna nos e unico rapport cu a wordo traha pa Aruba. Minister ta usa e rapport aki como base pa e ley, bisando cu segun e rapport aki all-inclusive no ta bon pa Aruba, pero mi no ta compronde dicon e ta bisa esey, siendo e rapport ta bisa algo otro. Dicon e minister kier sconde e rapport pa nos?”

Alternativa Di MEP

Lider di MEP a mustra tambe cu tin otro alternativa. “Si gobierno tin miedo cu e hotelnan regular ta bai converti den ‘ALL INCLUSIVE’, por pensa di brinda incentivonan na e hotelnan ey pa NO bira all-inclusive. Mester tene cuenta cu si un hotel regular cambia pa all-inclusive, ta pasobra no ta factibel pa e sigi como hotel regular; pesey mester pensa di duna cierto incentivonan cu e por bira factibel atrobe. Mester hasi un studio na esaki.

Un otro alternative ta pa cobra mas belasting riba ‘ALL INCLUSIVE’. Pero e alternativanan aki mester bin DESPUES di un studio pa por determina cu realmente ‘ALL INCLUSIVE’ ta asina malo pa Aruba, manera minister ta bisa.

Peticion Di MEP

Pesey mi a urgi minister Oduber pa tuma mas tempo pa hasi un bon investigacion, y pa traha un ley bon hinca den otro. Mi a urgi e minister pa busca mas sosten pa su plan den gremionan. Camara di Comercio, AHATA, ATIA, Aruba gastronomic Association tur a pidi pa un ‘cooling-off’ period, pa asina purba yega mas na otro den un ley mas balancea.

Y si di berdad e kier frena all-inclusive, mester lubida di e expansion di 1500 kamber mesora, y bin cu un moratorium mesora. Turismo ta nos unico pilar economico y nos tin e deber di cuida esaki” segun lider di MEP Evelyn Wever-Croes.