You are here

  • Sharebar

Pueblo Di Aruba Por Pasa Y Admira E EXPO Hoben Y Talentoso Na MFA Noord

Pueblo Di Aruba Por Pasa Y Admira E EXPO Hoben Y Talentoso Na MFA Noord

ORANJESTAD -- Diaranzon atardi, Comision di Hoben y Talentoso den presencia di e muchanan di Imeldahof, leidsternan, rolemodelnan y e directie di MFA Noord a habri e EXPO Hoben y Talentoso. 

Miembro di e Comision, sr. Ditto Acosta a hiba palabra splicando e meta tras di e proyecto Hoben y Talentoso como tambe e EXPO Hoben y Talentoso cu ya caba a pasa na diferente scol na Aruba. Director di MFA Noord, Sr. Richard Tromp tambe a dirigi su mes na esnan presente unda e la aplaudi e iniciativa di e comision pa expone e EXPO Hoben y Talentoso na MFA Noord.  Ta importante pa nos comunidad specialmente nos hobennan sera conoci cu e storia di e hobennan cu ta aparece den e Expo aki, hobennan cu a destaca riba varios tereno y cu a wordo reconoci pa nan talento y meritonan, tur ta fungi como un ehempel y inspiracion pa otronan. E proyecto Hoben y Talentoso a inicia tres anja pasa y tabata un iniciativa di Minister President Mike Eman.

Mester bisa cu e muchanan di Imeldahof a keda sumamente encanta di mira e rolemodelnan presente e  atardi aki. Hopi a intercambia di idea y pensamento, e  rolemodelnan a conta un poco di nan mes na e muchanan y mas cu claro e pasion cu nan tini pa loke nan ta haci. E rolemodelnan presente tabata Marc Farro, Emmazira Kelly, Francielle Lacle, Marc Erasmus, Evan Nedd, Ayrton Tromp, Esther Gomez, Criss Kross y Rosabelle Illis cu alabes ta miembro di e  Comision. Otro miembronan di e Comision presente tabata Ichell Simon, Maurits Malmberg y Seever Krozendijk. Pa MFA tabata tey Nando Kelly, Jamil Weleman y Omar Harms

Por ultimo sr. Acosta a haci entrega di algun di Hoben y Talentoso 2014 y 2015 na director Tromp di MFA Noord como tambe na e leidster di Imeldahof. 

E Pueblo di Aruba specialmente esnan di Noord y becindario ta keda cordialmente invita pa pasa MFA Noord y admira e  EXPO Hoben y Talentoso. E EXPO lo permanece pa dos siman y mei te cu 12 di Juli.