You are here

  • Sharebar

Parlamento A Pasa E Ley Pa Prohibi Uso Di Saco Di Plastic Cu Man

Parlamentario mr. Xiomara Maduro (MEP)
Parlamento A Pasa E Ley Pa Prohibi Uso Di Saco Di Plastic Cu Man

ORANJESTAD (MEP) -- Diamars ultimo Parlamento a pasa un Ley pa prohibi e uso di saco di plastic cu man cu ta wordo ofreci na mayoria supermercado y tienda na nos Pais.

For di 2008 caba tabata tin esfuerso haci pa introduci un maneho pa prohibicion di uso di saco di plastic na e supermercadonan. Pero e tempo ey lamentablemente e Gobierno no a conta cu e sosten di e comunidad pa logra su implementacion. Awor Parlamentario Donny Rasmijn a opta pa presenta e prohibicion aki den un Ley di inciativa cu a conta cu sosten unanime den Parlamento.

No ta tur saco di plastic ta prohibi

E Ley cu a pasa den Parlamento ta pone cu dentro di 6 luna, tur tienda of supermercado lo ta prohibi pa ofrece e saco di plastic fini cu man cu ta destina pa wordo usa un biaha pa e cliente cu ta haci compras. Saconan mas diki y duradero, no ta wordo probihi. Mescos no ta prohibi pa haci uso di e saconan di sushi preto. E prohibicion ta conta solamente pa e saconan fini cu hopi biaha nos ta wak ta bula rond y cu ta pega den cadushi, kwihi, mangelnan y otro matanan na nos Pais. E prohibicion por ser haya den articulo 55a di e Algemene Politieverordening den e sigiente texto: Het is verboden uit plastic vervaardigde tassen met hengsel, die naar hun aard bestemd zijn voor eenmalig gebruik aan te bieden. Ta prohibi pa ofrece tasnan cu man traha for di plastic cu door di nan arte ta destina pa wordo usa un solo biaha.

Campania di concientisacion

Dentro di poco lo mester sigi un campania di concientisacion cu lo splica mas den detayes riba e prohibicion aki y den cual tambe lo stimula e uso di tasnan mas duradero. Importante ta pa Pueblo compronde cu e prohibicion di e saconan di plastic ta necesario ya cu hopi biaha e saconan aki ta bula bay cu biento y ta pega den mangroves, drenta lama of pega den mata den mondi causando danio na nos medio ambiente. E ta importante sigur pa nos propio salud y esun di e generacionnan cu ta bin, pa nos medio ambiente keda liber di e contaminacion cu e saconan di plastic ta produci cu tempo. Y mas cu claro nos mester cuida nos medio ambiente pa asina nos no core cu turismo cual ta pone pan riba nos mesa.

Gabinete Eman a faya na grandi

Durante e reunion nos a trece dilanti cu e prohibicion di uso di saco di plastic ta un paso chikito den tur locual cu mester wordo haci pa conserva nos medio ambiente. E pasonan grandi mes Gabinete Eman no kier tuma y pesey a faya na grandi cu e medio ambiente di nos Pais. Nan no a traha mas riba e Ley pa proteha medio ambiente. A boycott e proyecto pa reduci sushi na dump na Parkietenbos pa un simpel capricho politico. Ta kibra nos naturalesa bou di e farce berde y asina a destrui un cantidad di mangrove y kwihi pa e Green Corridor bira posibel y no ta respeta e zona destina pa naturalesa manera a haci na Bubali Plas. Y awor den e deal cu Valero ta parce cu Gabinete Eman ta sinta haci wega atrobe cu nos medio ambiente.

Fraccion di MEP ta sostene e prohibicion

Nos Fraccion di MEP ta sostene tur iniciativa pa conserva nos medio ambiente y pesey e Ley di iniciativa di Parlamentario Donny Rasmijn pa prohibi saco di plastic cu man ta conta cu nos apoyo.