You are here

  • Sharebar

Banco Di Caribe Basketball Playoff Hopi Interesante

Banco Di Caribe Basketball Playoff Hopi Interesante
Djaweps Gators vs Warriors, djasabra Spartacus vs Spartans

WILLEMSTAD --  Banco Caribe semifinals basketballs playoff di senior ta birando interesante ora ku e ekipo di Janwé Spartacus a empatá e seri kontra di Montaña Spartans, ganando e di dos wega ku score di 82 pa 64.

Djasabra awó esun ku gana e di tres wega aki lo bai pa final. Di otro banda e ekipo di Gators a sali gana e promé wega di e seri mihó di tres kontra di e ekipo di Warriors, ku e score di 60 pa 47. Djaweps awó Warriors ta bolbe enfrentá Gators, den nan di dos wega,  i nan mester gana pa forsa e di tres wega.

Pues pa djasabra awó ta konosí ta kua ta e ekiponan ku lo bai pa e weganan final di kampionato nashonal di basket. Tur e kuater ekiponan den semifinals tin e posibilidat ainda  i tambe potensial pa yega finals.

Gators kontra Warriors

E seri aki ta un nada na fabor di Gators. Djaweps awó e ekiponan aki ta hunga nan di dos wega. Si Gators gana e wega djaweps awó nan ta pasa pa final. Pero si Warrriors gana e partido anto nan lo hunga e wega desisivo djasabra. Gators tin e hungadónan, manera Bryan Perret Gentil, Irving Thode i Francis Melfor,  ku e abilidat pa anotá tirunan dja leu. Warriors ta un ekipo mas fuerte den wega bou di basket ku e hungadónan Trevor Lebast i Sharif Sprockel. Anke ku mester bisa ku e hungadó Norendy Brazil a bin ta sobresalí e kampionato aki, anotando for di fastbreak i tambe ku su tirunan. E hungadó di Warriors ku por anotá tiru dja leu, Jose da Siva,  no ta den su drive i no ta anotando manera por spera di dje den último partidonan ku e la hunga. Ta rekomendá tur hende pa bin wak e wega di djaweps awó na SDK na Brievengat. E wega lo ta 8’or di anochi. Warriors lo bin tur ku tin pa empatá e seri aki.

Montaña Spartans kontra Janwé Spartacus

E seri aki ta empatá kaminda Spartans a Sali gana e promé wega i Spartacus a gana e di dos wega djasabra último. Djasabra awó nan lo enfrentá otro pa 8’or di anochi na SDK. Esun ku gana lo pasa pa final. Spartans ta e ekipo ku mas hóben den e kampionato aki. Esaki ta reflehá tambe den nan weganan rápido i di pone preshon defensivo kontinuo.  Pa loke ta nan ofensa nan tin Michealsjenko  Osepa, ku a bin for di Merka unda e la hunga algun aña College basketball. Osepa  a bin ta anotá tantu ku tiru djafó komo ku su penetrashonnan. Ademas nan tin e hungadónan Marc Domacasse i Shurelton Hanley ku tambe ta anotá ku tirunan dja leu i ta anotá for di nan penetrashonnan. Spartacus ta un ekipo balansa ku a bin ta rehuvense ku hungadonan for di su kategorianan hubenil. Nan tin komo point guard e hungadó  Elvis Janga di 16 aña ku a bin ta hasi un bon trabou, dirigiendo e wega i anotando ora mester. Tambe Spartacus tin e hóben yu di Kòrsou di 23 aña ku a biba 20 aña na Venezuela, Victor Leander. Victor ta mas o ménos dos meter di haltura i ta sobresaliendo pa e ekipo di Spartacus. Ademas no por keda sin menshoná e hungadó di eksperensia di Spartacus Gideon Wout ku su rebotenan i ta anota ora mester.