You are here

  • Sharebar
Propietario Zara Aruba, Camilo Ibrahim:

Ta Aprecia Y Comparti Balornan Di Pasion, Determinacion Y Firmesa Di Gabinete Mike Eman

Ta Aprecia Y Comparti Balornan Di Pasion, Determinacion Y Firmesa Di Gabinete Mike Eman

ORANJESTAD -- Inditex, e compania propietario di Zara, entre otro marcanan di renombre internacional, ta un empresa exigente y cuidadoso den e decisionnan cu ta tuma.

Asina propietario di Zara Aruba, Sr. Camilo Ibrahim a duna di conoce. Den su discurso pa cu e ceremonia di apertura di e tienda grandi den Oranjestad, el a conta cu e decision pa habri un tienda asina den Caribe, no tabata facil. Despues di a bishita varios isla manera Corsou, St. Maarten y otronan den nos region, ehecutivonan di Inditex a keda combenci cu e miho luga ta Aruba. E factornan cu a hunga un rol importante den esaki ta e locacion dilanti di Plaza Daniel Leo, e estadisticanan turistico y e vision y maneho di Gabinete Mike Eman.

“For di prome biaha cu nos a wak e ubicacion na e espectacular plaza aki, nos a sinti cu e ta un ubicacion special cu tabata pidi pa un tienda di e calidad di Zara.” Esey adicional na e trabou y pasion cu Gobierno y Minister President ta dedica na e recuperacion di e area central di e isla, specificamente Oranjestad, “ta algo cu en berdad a toca nos masha hopi,” e ehecutivo a bisa.

E tempo ey, Richard Harms di Ministerio di Asuntonan General, Innovacion, Ciencia y Desaroyo Duradera encarga cu e relacionnan cu comercio, a topa cu e inversionistanan  Venezolano y representantenan di Inditex. “E tabata papia nos di cosnan cu ta basicamente den aire paso ainda no tabatin nada pa wak,” Ibrahim ta recorda. “E tabata bisa nos cu akibanda ta bay pasa un tram, aki lo bira un boulevard, pero no tabata existi; djis señalnan den aire. Pero el a bisa nan cu tanto pasion y un credibilidad importante, cu a keda transmiti y logra loke awe nos ta inaugurando.”

E proceso di establecimento legal y construccion a tuma hopi tempo contrario na e deseo di Minister President, kende segun e inversionista Venezolano, semper a pusha ekiponan di ambos banda pa keda cla lihe. Awendia por bisa cu e temanan compleho a wordo papia y aclarea den tempo record; semper basa riba husticia. “Tough but fair,” e ehecutivo ta recorda. “E realidad ta cu semper nan tabata exigente cu nos, pero a duna nos semper e espacio den marco legal pa haci esaki posibel.”

Ibrahim y su ekipo ta ta gradici Minister President Mike Eman y su ekipo pa a kere den e proyecto y yuda den tur loke tabata necesario. “Zara ta un di e piedranan fundamental di e construccion di loke por ta e area nobo urbano di Aruba y nos tambe ta kere esey,” e ehecutivo a finalisa bisando.