You are here

  • Sharebar

Vision Di Gabinete Mike Eman Tabata Clave Den Decision Di Zara Pa Habri Tienda Na Aruba

Vision Di Gabinete Mike Eman Tabata Clave Den Decision Di Zara Pa Habri Tienda Na Aruba

ORANJESTAD -- Un ocasion masha anticipa den e trayecto cu ta e revitalisacion di centro di ciudad ta e apertura di tienda Zara.

Finalmente y cu hopi emocion, e momento a yega diaranson anochi y den nomber di Gobierno di Aruba, Minister President Mike Eman a asisti na e ceremonia. Aki el a hiba palabra gradiciendo e confiansa deposita dor di Grupo Phoenix World Trade y Inditex den e vision di su gabinete pa hiba comercio di Oranjestad na un nivel mas halto. Tambe e mandatario a felicita tur esnan envolvi den e proyecto y a desea nan hopi exito.

Esnan presente a tende tambe for di Sr. Julio Monasterio, representante di Inditex, cu ta e compania propietario di marca Zara. El a indica cu di e 2.100 tienda Zara cu tin rond mundo, esun na Aruba ta conta cu e format di mas moderno te aworaki. “Nos ta honra di por forma parti di e atractivo di e isla y loke e ta ofrece na su miles di bishitante anual,” Monasterios a bisa. “Nos ta hopi afortuna di por tin, na un pais asina multicultural, loke Inditex ta yama e ‘internacionalisacion di moda’.”

E tienda ta resalta den e espacio na inicio di Aruba su caya principal. E edificio di cuater piso di showroom ta bay habri tur dia, incluyendo diadomingo. Gerencia a duna di conoce cu te aworaki a emplea 67 persona, di cual 65 ta local y e prijsnan di e mercancia ta esnan di mas competitivo compara cu mayoria otro sucursal. Esaki ta un decision strategico pa promove Zara Aruba como esun di mas bentahoso den Caribe, Latinoamerica y America.

Camilo Ibrahim, propietario di Zara Aruba, di su banda a comparti cu esnan presente na e apertura tocante e aspectonan cu a motiva nan pa establece na Oranjestad. Diferente na tur otro isla cu a bishita den nos region, for di e prome instante cu a bishita Aruba, a keda combenci di su atractivonan comercial y economico. “Inditex ta un empresa exigente y cuidadoso den e decisionnan cu e ta tuma,” Ibrahim a splica. “E trabou y pasion cu Gobierno y Minister President Eman ta dedica na e recuperacion di e area central di e isla, specificamente Oranjestad, ta algo cu, en berdad, a toca nos masha hopi,” e ehecutivo a bisa finalisando su discurso.