You are here

  • Sharebar

Bin Celebra 40 Aña Himno Y Bandera Y 30 Aña Status Aparte Cu MEP

17 Y 18 Di Maart Na Nos Cede
Bin Celebra 40 Aña Himno Y Bandera Y 30 Aña Status Aparte Cu MEP

ORANJESTAD (MEP) --  Movimiento Electoral di Pueblo (MEP) ta extende un invitacion na Pueblo henter pa celebra 40 aña di Himno y Bandera y 30 aña di Status Aparte, riba 17 y 18 di maart venidero, cu nos na Cede di MEP.

E celebracion lo cuminsa 17 di maart anochi pa 9’or y lo termina 18 di maart pa 10’or di anochi.

17 di maart

Riba 17 di maart nos lo cuminsa cu un caminata cortico for di Plaza Status Aparte (banda di rotonde Santa Cruz) pa Cede di MEP. E caminata lo cuminsa pa 9’or di anochi bao guia di polis. Na Cede di MEP lo tin entretenimento di e popular y exitoso ‘Grupo di Betico’. Lo tin tambe un ceremonia chikito. E anochi lo culmina pa 12’or di anochi unda lo hisa e Bandera mas grandi di Aruba bao canto di nos Himno ‘Aruba Dushi Tera’. Asina ta yama bon bini na 18 di maart 2016, dia di Himno y Bandera.

18 di maart

Dia di Himno y Bandera, 18 di maart, ta yena cu actividad cultural y musical. Pa 10’or di mainta lo habri celebracion di 40 aña Himno y Bandera y 30 aña Status Aparte logra door di Libertador G.F. ‘Betico’ Croes (q.e.p.d.) cu un exposicion. Un exposicion cu ta rebiba e lucha di Betico. Un lucha pa nos libertad. Importante den e lucha ta nos simbolonan di identidad, esta nos Himno y nos Bandera. Lo wordo exponi e ‘guera’ cu a wordo hiba cual a duna Aruba su Status Aparte na aña 1986. Naturalmente nos Libertador mes lo ta den e exposicion, kende ta e arkitecto di Aruba su Status Aparte. Na e ocasion aki lo duna reconocimento na comision Himno y Bandera, comision Status Aparte, na tur tres Compositor di e Himno, Diseñador di e Bandera y Arkitecto di Nos Status Aparte –Nos Libertador. Pa 1’or di merdia lo start un torneo di domino cu participacion di aproximadamente 6 ekipo. E torneo aki lo termina alrededor di 7’or pa 8’or di anochi. Desde 2’or di merdia riba e ‘stage’ pafo dilanti di Cede lo tin diferente grupo di baile cultural, artistanan y bandanan musical. Nos lo tin entre otro gruponan di baile Candy Dancers y Gucci Dancers, artista solista lo ta Gianmaris Croes, Jaydilene Croes y Tico Montesinos. E bandanan musical cu lo presenta ta Zeta Band, Mistical Connection, Rincon Boys, Tsunami y Buleria.

Mucha y hoben

Pa nos muchanan lo tin un ‘kidscorner’ cu Dino Jump. Tambe lo haci weganan popular cu nos muchanan. Siguridad lo tin den forma di vigilancia henter dia pa nos muchanan. Pa nos hobennan lo tin ‘gaming event’ parti paden den Cede. Lo tin weganan manera Black Ops 2 y FIFA 16.

Cuminda y ambiente

Alrededor di 20 tent lo ta ocupa cu cuminda tipico di Aruba pa tur boca por saboria y e stoma keda contento. Pa reservacion por yama na 5935452. Tambe lo tin un bar pa por refresca e garganta durante dia y anochi.

Asina por conclui cu celebracion di Himno y Bandera lo ta un dia conmemorativo, informativo, cultural yena cu masha hopi ambiente mes manera MEP so por brinda. Asina ta bisti bo t-shirt, pone e banderin na auto y yega Cede di MEP pa nos celebra e logronan mas grandi di Betico na un manera unico.