You are here

  • Sharebar

Pueblo A Keda Pidi I Kor Di Maestronan Penshoná Ta Komplasé Ku Su Konsierto “Ban Bèk Bank’i Skol”

Pueblo A Keda Pidi I Kor Di Maestronan Penshoná Ta Komplasé Ku Su Konsierto “Ban Bèk Bank’i Skol”
Frank huntu ku e publiko.

WILLEMSTAD -- Na desèmber último Kor di maestronan penshoná a trese na dos okashon e tremendo konsierto “Ban bèk bank’i skol” ku a resultá un éksito rotundo ku dos sala kompletamente bendí.

Tabata trata di un repertorio di kantikanan di skol di antes na diferente lenga, ku a trese bunita rekuerdonan serka e públiko. E meta tabata pa reskatá e kantikanan aki, ku ta forma parti importante di nos herensia kultural. Presentenan tur tabata kanta huntu ku e kor i tin hopi hende ku asta a yora di emoshon. Tabata reina un ambiente di dushi nostalgia.Te awe ainda miembronan di kor ta risibí repetídamente yamadanan pa ripití e konsierto aki. Despues di basta deliberashon a tuma e desishon pa komplasé ku e petishon di komunidat. Dia 13 di mart benidero e koro ta bolbe trese e konsierto “Ban bèk bank’i skol” di 16.00 – 19.00 or den Atrium di Banko Sentral na Skalo.

Karchinan ta optenibel na Mensing’s Caminada i serka miembronan di komishon na tel: 737-3991 (Viola), 526-2854 (Franklin), 737-7550 (Lai) i 525-4988 (Lita).

Tur hende ta bonbiní i si bo a keda’fo bia pasá, sòru pa e bia aki sí bo ta den!

Huntu ku e komunikado aki algun potrèt di aña pasa den Atrium di Banko Sentral.