You are here

  • Sharebar

Estreno Di Pikete Ku Un Tremendo ” Salon Yen Di Pikete”

Estreno Di Pikete Ku Un Tremendo ” Salon Yen Di Pikete”
Trailer Estreno Yen di Pikete.

WILLEMSTAD -- E aña aki e grupo Estreno di Pikete a partisipá pa di 40 aña den nos Karnaval. 

Pa selebrá e logro bunita aki e grupo a invitá 40 persona ku for di un prinsipio a  partisipá den e marchanan di Estreno di Pikete i ku pa bastante aña no ta partisipando  mas aktivamente den nos Karnaval. Estreno a traha un trailer speshal  i a yama e trailer aki: “ Salon yen di Pikete” pa duna elogio na e “baluartenan”aki di primera ora.

Wel e Salon aki a resultá un tremendo  éksito i tur e partisipante a gosa  masha hopi mes. Nan tur a apresiá e gesto di Estreno di Pikete pa di un manera hopi bunita envolví nan den e selebrashon di Estreno su di 40 aña di partisipashon den nos  karnaval. Riba e trailer tabata un fiesta total speshal  ora ku Dobble R tabata entoná e piesanan klásiko di tur tempu. Ata ora e “trein”  kuminsá  zona henter e Salon tabata vibra di e bailamentu di e grupo.

Den e miembronan di primera ora tabata tin masha hopi miembro konosí den nos komunidat pero un di nan ku mester menshoná ta Sra. Maria Liberia Peters, nos eks Promé Minister ku pa  sigur mas di 10 aña no  ta jump mas den karnaval. Si bo a wak kon Sra. Maria Liberia  tabata gosa  tabata un plaser  pa wowo.

Ku e  “Salon Yen di Pikete “ , Estreno,  a kompletá un siklo kompletu di Karnaval. Nos tin e grupo tradishonal di Estreno, pa algun aña kaba,  e grupo Estreno Mas Pikete, speshal  di focus riba nos hóbennan i awor e ” Salon Yen di Pikete “  ku ta e baluartenan di primera ora.  Awor Estreno di Pikete a hinka su mes den un problema serio ya ku bosnan den e partisipantenan den e  “Salon Yen di Pikete “ a kuminsá zona ku nan lo ke keda forma parti di nos karnaval. Despues di Karnaval,  Estreno lo tin ku bai deliberá kon lo ta bai hasi esaki ya e baluartenan  a keda sumamente enkantá ku nan partisipashon.

Estreno di Pikete a demostrá ku e ta un grupo ku ta bon organisá i ku tur su kosnan ta kana zeta i segun regla. Un pabien grandi na Gatchi I Ruth Sint Jago i henter e tim  ku ta dirigí Estreno di Pikete ku un organisashon kampion.  Ora bo kere ku Gatchi ta bira nèrvioso ora kosnan ta manera pega, e ta keda trankil i buska solushon pa tur problema. Ta  òf Gatchi tin nèrvio di heru òf eksperensia di 40 aña a siña e  kon tin ku hasi sierto kosnan.

Estreno di Pikete masha pabien ku boso 40 aña di partisipashon den nos Karnaval i nos ku a partisipá den e  “Salon Yen di Pikete “, sigur tei pa keda.

Riba e potrètnan por mira kon bon e grupo di Baluartenan tabata pasa den Nan Salon yen di Pikete.