You are here

  • Sharebar

Partido MAN 45 Aña, 1971 – 2016

E Promé Parti Di Nos Historia

WILLEMSTAD (MAN) -- Nos ta kòrda añanan ’60 ku moveshonnan den Karibe, kaminda e habitantenan di e diferente islanan di Karibe a hiba luchanan pa respetá nan identidat.

E moveshon aki a yega serka nos na Kòrsou tambe i tabatin proyekto i diferente fundashon ku tabata traha pa duna mas rèspèt na identidat di e hòmber/muhé di kolo riba nos isla.

E moveshon i pensamentunan aki, no tabata basa solamente riba kolo, pero loke ta mas of mes importante, riba e diferensha entre e nivel di bida bou di nos poblashon. E sentimentunan aki entre otro, esta pa logra mihó nivel di bida di gruponan den nos komunidat, i haña rekonosementu i rèspèt pa nos propio identidat, a kondusí na lanta un partido polítiko den aña 1971, esta Partido MAN, Movementu Antia Nobo.

Fundadornan ta:

Joy Alberto, Marco de Castro (qepd), Andres Constancia, Wendel Davis, Jules Eisden, Roy Markes, Nico Martes, Donny Martha, Reintje Martina, Silvio Plantijn (qepd), Ulrico Schotborg, Ga Zimmerman (qepd) i Don Martina, kende a funshoná komo lider di MAN pa hopi aña ku a sigui.

Lider di MAN, direktiva i miembresia di MAN ke gradisí esnan ku a bai nos dilanti. Masha danki di a lanta un partido ku vishon i un mishon. Dia 6 di febrüari 2016 Partido MAN ta kumpli 45 aña. Pa por a yega asina leu nos ke gradisí pueblo di Kòrsou ku a mantené Partido MAN den kontienda polítiko, paso MAN su base ta den pueblo. Danki ku e pueblo a sa di duna MAN su konfiansa kada bes atrobe.

Ta e momentu pa nos tira un bista riba e 45 añanan i e desaroyo ku Partido MAN a pasa aden. Añanan den kua kontinuamente MAN a traha duru internamente pa fortalesé su vishon i mishon basa riba su prinsipionan:

Solidaridat, Hustisia Sosial, Igualdat I Dignidat Humano

Prinsipionan ku ta konosí serka pueblo di Kòrsou komo prinsipionan di MAN. P’esei awe ku Partido MAN ta kumpli 45 aña, ta nesesario pa mustra a base di trabounan ku Partido MAN a hasi, kon importante e  prinsipionan aki ta pa nos partido.

MAN A Kuida Pueblo

Pa kumpli ku esaki MAN semper a traha pa duna pueblo aksesibilidat na loke pais tin di ofresé. Esaki ta nifiká derechonan igual den e nivel di bienestar ku e pais a alkansá. Di e forma aki MAN a bin ta traha pa empoderá e pueblo pa por hasi uso di su derechi, p.e. e derechi riba trabou/empleo.

MAN su lema ta: Kombatí pobresa pa via di trabou i pa logra esei den pasado MAN a bin ku e proyekto pa ehekutá 1000 intervenshon pa aña serka esnan desempleá pa yuda nan yega lihé na un trabou. Un hende mester por traha i gana su entrada. P’esei tur biaha ku MAN tabata den gobièrnu tin proyektonan pa yuda esnan desempleá; p.e. entrená hóbennan pa nan por traha riba tereno di Refineria; entrená kobradó di ònderstant pa bira Alfa Hulp i asina yuda hende grandi of hende malu of ku limitashon den nan kas; a laga mas ku 100 hende bai Pro Alfa pa siña skirbi of hasi un fishi; duna kurso Kon pa Solisitá; buska trabou pa hende via di e Job Center, etc.

Den periodo ku MAN ta den gobièrnu nos ta kòrda tambe entrenamentu ku desempleadonan tabata haña pa nan siña kon yega na trabou, esta Traha Dam Warda Awa. Mi ke mi por tambe ta otro proyekto. MAN den gobièrnu a bin ku e proyekto Mi Tambe ke Traha, kaminda hendenan por a inskribí i gobièrnu su servisio ta registrá i yuda nan buska trabou. Alabes 40 hende a haña oportunidat di siña planta fruta i berdura. Tur esaki den e kuadro di siña esnan ku mester, kon prepará nan pa gana

nan mes pan. Banda di esei semper MAN tabatin bista pa loke ta problemanan di tur dia di e hende i su famia.

Un di e derechonan humano básiko ku semper MAN a trata na kumpli kune ta pa e hende/famia tin awa den su hogar, awa ku ta sali for di kranchi. P’esei tambe ultimo aki MAN a instalá un Helpdesk, pa gobièrnu huntu ku Aqualectra bolbe konektá kasnan ku no tabatin awa, riba e ret. Manera MAN a sali for di gobièrnu e proyekto aki a disparsé.

Partido MAN a demostrá ku por kita un problema chikí for di kaminda ku tiki sèn, i e pueblo ta haña un ganashi grandi. Esaki por ehèmpel ta e proyekto di Retoke, kaminda gobièrnu ta laga drecha un kos na kurpa di kas di un persona, p.e. un porta, un stupi, un baño, etc. Meskos ta konta pa e proyekto kaminda ta fasilitá pa e kas por haña bòm di gas. Proyekto di Renbak a keda komo un marka/stèmpel di MAN. Esaki ta demostrá ku un renbak na kas ta yuda e famia pa semper tin awa, pero tambe kon ta kuida su medio ambiente dor di fangu awa i spar e pa uso optimal. A repartí pera di lus CFL na 750 kas, pa asina yuda nan spar koriente.

Ora nos ta papia di derechinan igual pa nos tur, no por keda sin menshoná enseñansa i edukashon. Enseñansa i edukashon ta hopi importante pa MAN pa asina duna e mucha e oportunidat di prepará su mes pa e por logra den bida. Ta p’esei nos konosé Formashon Básiko, Enseñansa di Fundeshi, Pre-eskolar i Enseñansa Avansá. MAN semper ta mira importansha pa sostené e mucha i su famia, pa e por sigui enseñansa. Aktividat manera Mas Skol, Leerwerktraject i Naschoolse Opvang ta ilustrá esaki. MAN durante su eksistensha a boga semper pa e mucha haña enseñansa den su lenga materno esta papiamentu.

Seguridat tambe a forma parti importante den MAN su trabounan. Laga nos menshoná akinan pa hasi kayanan i tráfiko mas sigur, pa hasi tráfiko rondó di skolnan mas sigur, pa sòru pa den nos barionan tin mas lus di kaya i iluminashon. Tur e kosnan aki ta pa nos duna mas seguridat na e habitantenan di un bario i e muchanan di skol.