You are here

  • Sharebar

Eksitoso Apertura Di Sede Di Partido Pro Kòrsou

Ivar Asjes, Lider Politiko di Partido Pro Kòrsou
Eksitoso Apertura Di Sede Di Partido Pro Kòrsou
Apertura di e Sede di Partido Pro Kòrsou na Brievengat.

WILLEMSTAD -- Dia 24 di yanüari último, Partido Pro Kòrsou ofisialmente a habri su Sede pa Pueblo di Kòrsou.

Manera ta konosí, e Sede ta ubiká djis pegá ku e Plenchi di Tráfiko ‘Sam Buntin’ na Brievengat. Ku un asistensia di riba 150 simpatisadó, Partido Pro Kòrsou por mira bèk riba un evento sumamente eksitoso.

Tantu Tania Ataoellah-Henriquez i Ivar Asjes, komo fundadónan di Partido Pro Kòrsou a hiba palabra pa yama tur simpatisadó bon biní i duna mas informashon tokante e propósito komun: “Ban Elevá Kòrsou”, esta ban traha huntu pa logra mas trabou, bienestar i seguridat pa Kòrsou. Ademas, a presentá e otro miembronan di direktiva na e simpatisadónan ku a akudí na e apertura pa nan konosé e karanan nobo ku lo bai trese un diferensia den polítika na Kòrsou. Partido Pro Kòrsou ta formando un ekipo nobo di siudadanonan kapas, kompetente i dispuesto pa sirbi i representá Pueblo den Parlamento i Gobièrnu. E partido lo profilá di forma alerta, ekspresando su opinion i punto di bista, pero semper ofresiendo tambe alternativanan bon argumentá. Ku otro palabra, un partido pro-aktivo i konstruktivo ku ta analisá, dialogá, debatí i yuda pensa riba solushon i resultadonan positivo na interes di Kòrsou.

Durante e enkuentro públiko di djadumingu último, hopi simpatisadó ku a presensiá e apertura di sede a disidí pa bira miembro di Partido Pro Kòrsou, loke ta motivá e dirigentenan di e partido pa sigui traha duru. Partido Pro Kòrsou ta gradisí tur simpatisadó pa nan presensia i konfiansa.