You are here

  • Sharebar

Grupo Di Karnaval Caché Preparando Pa Selebrá Su Di 20 Aniversario En Grande

Grupo Caché
Grupo Di Karnaval Caché Preparando Pa Selebrá Su Di 20 Aniversario En Grande

WILLEMSTAD -- Preparashon ta siguiendo segun skema pa selebrashon di e di 4 lustro di Grupo di Karnaval Caché.

Espektativa bou di espektadornan di e marchanan prinsipal di Karnaval di Kòrsou ta hopi haltu pa wak kiko Caché lo presentá e aña aki.

Atraves di último dos dékada Grupo di Karnaval Caché semper a desfilá ku kreashonnan ku realmente a hala atenshon di tur hende ku a presensiá nos fiesta kultural di mas grandi. Den un kòmbersashon ku nos a tene ku Giovanni Roozendal, presidente di ‘Caché’, el a bisa ku e aña aki no a spar ningún esfuerso pa presentá na e nivel akustumbrá. “E tema ku nos a skohe pa e aña aki ta Porselana Chines.” Tin 4 sekshon di kua den e sekshonnan Gosadera i Silver a keda djis algun posibilidat di partisipashon habrí. Den mesun rosea nos ke bisa pa no warda te na último momento pa no keda desepshoná ora e par di kuponan ei tambe a yena. Nos mester pone un límité pa e kantidat total di partisipante pa gosa tur afó i pa nos por brinda tur hende e bon servisio ku ta kustumbrá di dje,” Roozendal a bisa.

Pa e aña aki, meskos ku tabata e kaso pa hopi aña animashon musikal lo tan a enkargo di GIO Fuertísimo. “Ta di mas bisa ku GIO ta un di e agrupashonnan musikal ku tur grupo lo ke tin pa animá ku músika di nivel haltu i nos ta sumamente orguyoso ku nos tin GIO komo nos banda di kas e aña aki tambe. GIO lo presentá riba un tráiler nobo i super moderno,” Giovanni a sigui bisa.

Mas aleu Roozendal a informá ku e aña aki e grupo lo tira un lus ainda mas skèrpi riba patrosinadónan. “Sin aporte finansiero di kompanianan nos lo no por kubri tur e gastunan di partisipashon. Nos ta sumamente agradesí na tur kompania i instansia ku a duna nan aporte pa nos por realisá partisipashon den e marchanan prinsipal di Karnval, pero ke hasi menshon spesial na Guardian Group Fatum ku for di añanan inisial di ‘Caché’ t’ei ku nos.”

“Mi ke bolbe enfatisá ku ‘Caché’  ta bai selebrá su di 20 aniversario en grande,” Giovanni a sigui bisa. “Si bo ta deseá na forma parti di e selebrashon históriko aki, yama òf app mi persona awe mes na 528-5884 of kòntakt Kenrick Chin A Ling na 560-9250. No tarda mashá pa no mester di lamentá despues.”

Pa mas informashon bishitá e website cachecuracao.com i sigui tur desaroyo riba e pagina Facebook/GrupodiKarnavalCaché.