You are here

  • Sharebar

‘The Impact Of Going Green’ Tabata Un Eksito Rotundo

‘The Impact Of Going Green’ Tabata Un Eksito Rotundo; E Ta Komienso Di Un Era Nobo, Sostenibel I Duradero
E Ta Komienso Di Un Era Nobo, Sostenibel I Duradero

WILLEMSTAD (MAN) -- Sostenibilidat i durabilidat no ta algu eksklusivo di un grupo so.

E proyekto Green'S'Cool ta un proyekto ku a wòrdu pensa i desaroyá na Aruba. Planologo stratega sr. Geert Kooistra di Hulanda huntu ku sra. Bianca Peters di Innovatie Centrum Aruba, a duna tayer na algun skol aki na Kòrsou bou e moto "Green'S'Cool". Hóbennan a haña presentá un reto pa pensa kon nan por hasi nan skol i pais unu mas sostenibel energetikamente. E proyekto positivo aki tin komo meta pa krea un kantidat grandi di ideanan práktiko kon pa baha konsumo di energia na Kòrsou.

Green'S'Cool ta parti di un programa di sostenibilidat i durabilidat ambisioso di Gabinete Eman. Sra. Giselle Mc William di Partido MAN a tuma e inisiativa pa hasi algu den e sentido aki na Kòrsou tambe, pues a kuminsá siman pasa ku e proseso di sostenibilidat i durabilidat. Despues di e presentashon di e proyekto Green'S'Cool na skol, sr. Geert Kooistra i sra. Bianca Peters a duna un charla interesante pa públiko na UoC, djamars 24 di novèmber, kaminda un kantidat grandi di hende a akudí. E siguiente dia a sigui ku e tayer na skol bou di hóbennan sumamente entusiasmá.

E siman di ‘The Impact of Going Green’ ta sera ku e Fundraising di Partido MAN na Sta Barbara Resort, djaweps 26 di novèmber, kaminda ku hopi kompania grandi i prestigioso a asistí pa tende di e dos invitadonan, sr. Geert Kooistra i sra. Bianca Peters, kon i kiko Kòrsou tin ku hasi pa krea un ekonomia i sosiedat sostenibel i duradero. Energia di bientu i solo, i resiklahe ta algun di e kosnan ku nos pais tin ku invertí mas den dje. E loke sigur por hasi e proyekto Green'S'Cool bira eksitoso ta diálogo i traha huntu ku otro, tantu sektor públiko komo sektor priva. Green'S'Cool Curacao pronto lo keda ofisialisá pa sra. Giselle Mc William.