You are here

  • Sharebar

Gobièrnu Di Kòrsou Ta Felisitá Jean-Julien Rojer I Horia Tecau Ku Nan Viktoria Na Wimbledon

Horia Tecau I Jean-Julien Rojer

WILLEMSTAD (GDK) -- Gobièrnu di Kòrsou, enkabesá pa nos Promé Minister, sr. Ivar Asjes, tambe ta felisitá Jean-Julien Rojer i su kompañero Horia Tecau ku nan viktoria históriko aya na Wimbledon, Inglatera. Manera ta konosi, e torneo di tènis di Wimbledon ta esun di mas prestigioso na mundu. Pues ta ku gran orguyo Kòrsou ta selebrá ku un di nos yunan di tera a gana e torneo di tènis ‘grand slam’ importante aki.

Despues di un partido elektrisante Rojer huntu ku Tecau a sa di gana e 3 sètnan (7-6, 6-4, 6-4) pa bira kampion di ‘men’s doubles’. Komo yu nasé i lantá na Kòrsou den e bario di Mon Repos, pueblo por ta sumamente orguyoso di Jean-Julien Rojer ku su logro ekspeshonal komo tenista profeshonal internashonal. Su pashon, perseveransha i sakrifisio a uni huntu pa yega na e momento kulminante aki den kua un di su soñonan di mas grandi a bira realidat. Un palabra di felisitashon tambe na Jean-Julien su mayornan i demas famia ku semper a sostené den su pashon deportivo. Laga pa e ehèmpel positivo di Jean-Julien aki motivá nos hóbennan pa sigui kere den nan mes, den nan deporte i den nan soño. Pa chikí ku nos isla ta, nos logronan riba diferente ramo ta grandi. Jean-Julien, masha pabien!