You are here

  • Sharebar

Promé Minister Whiteman A Reuní Ku PWFC, APRI I MDPT

Promé Minister Whiteman A Reuní Ku PWFC, APRI I MDPT
momentu durante reunion. Drpd; Promé Minister Whiteman, Angelo Meyer i Dennis Daal ámbos di PWFC, Werner Wiels (MDPT) i Ingemar Lira Ponte i Henri Emerenciana ámbos di APRI.

WILLEMSTAD -- Ayera djadumingu 9 di novèmber Promé Minister Whiteman a risibí representantenan di sindikato PWFC, APRI (Asosashon pa Empleadonan di Refineria Isla) riba nan petishon pa ekspresá nan inkietutnan rondó di refineria.

Na e okashon ei señor Werner Wiels di MDPT (tim di proyekto multidisiplinario) tambe tabata presente komo konsehero di Promé Minister riba e tópiko aki. Tópikonan ku a keda tratá durante e reunion tabata maneho di gobièrnu relashoná ku futuro di refineria, posibilidatnan pa redusí molèster i futuro negosiashonnan ku PDVSA. Minister Whiteman a mustra ku gobièrnu ta hasi tur posibel pa hasi e lokual ta nesesario pa Isla keda habrí i alabes mehorá kalidat di aire pero tambe mantené e bon relashon ku Venezuela i PDVSA.

Promé Minister Whiteman a mustra ku e ta para pa bienestar i interes públiko pues ta mira tambe bentaha ku mantenshon di Isla. Primeramente Promé Minister a splika ku e proseso ku a kana 10-10-10 pa organisá pais Kòrsou tabata defisiente i ku esaki ta e motibu ku diferente servisio di gobièrnu no ta funshoná bon, pues tambe órganonan di kontròl. A risibí karta di Minister Plasterk ku ta informá ku Hulanda ta dispuesto pa duna yudansa. Promé Minister a splika ku pa algun aña kaba tin un koperashon entre Inspekshon di Medio Ambiente Hulandes (Inspectie Leefomgeving & Transport) i nos kuerpo di Inspekshon. Ta mediante e akuerdo aki por a lanta nos propio Inspekshon di Medio Ambiente i ta sigui ku e diferente fasenan pa loke ta e trabounan ku nos Inspekshon lo tin di hasi.

Realidat ta ku habitantenan di barionan pabou di refineria ta bisa na promé lugá ku no mester sera refineria pero ku último tempu emishon i zonido for di tereno di Isla a oumentá. Pues ku yega na redukshon di e faktornan aki e situashon por bira tolerabel. Promé Minister a duna 2 funshonario di ministerio e tarea pa sondia i buska un eksperto internashonal di refineria pa huntu ku Isla yega na e situashon ku nos tur ta deseá. Esaki ta un di e posibilidatnan ku lo por plantea na Hulanda pa yudansa.