You are here

  • Sharebar

Sra. Dymphna Van Der Lans, CEO Di Clinton Climate Initiative A Desayuna Cu Un Grupo Di Hende Muhe Na Aruba

Sra. Dymphna Van Der Lans, CEO Di Clinton Climate Initiative A Desayuna Cu Un Grupo Di Hende Muhe Na Aruba

ORANJESTAD -- Sra. Dymphna van der Lans, CEO di ‘Clinton Climate Initiative’ tabata na Aruba pa atende e di seis Green Aruba Conference.

El a fungi tambe como panelista hunto cu Prome Minister Eman. Su remarke final tabata cu si di berdad bo kier tin atencion pa e problemanan complica di e islanan, bo mester participacion di tur hende den bo sociedad. “Pa asina hunto bin cu e solucionnan creativo y corecto. Cu otro palabra, e hende muhe mester wordo envolvi.”

Van der Lans a bisa cu esey tabata su palabra final den e panel, esta cu mas y mas hende muhe di e islanan mester wordo envolvi pa yuda den e problemanan cu cambio di clima ta trece cu ne.

CEO v.d. Lans a bisa cu despues el a pensa, pakico warda den crea un plataforma di hende muhe un otro biaha, si e oportunidad tey pa haci esaki awor caba. “Asina nos a dicidi pa invita e hendenan muhe cu nos ta trahando cu nan riba e islanan cu ta na Aruba y di Aruba mes tambe pa un desayuno pa asina comparti ideanan y posibel solucionnan. Nos tabata cu mas o menos 25 hende muhe, entre nan sra. Eman y algun miembro di Parlamento. “Nos a papia di e necesidad cu tin pa talentonan femenino nobo pa asina nan haya nan propio voz. Nan por wordo realmente inspira pa bin dilanti y vocifera nan mes y bira futuro lidernan den e region, specialmente riba tereno di sostenibilidad y di cambio di clima.” Sra. van der Lans a bisa cu p’e e desayuno tabata un momento special. E highlight di su estadia.

E intencion ta pa otro aña bin hunto un bes mas, el a bisa. “Tambe nos a haci e compromiso cu ‘Clinton Foundation’ lo atende asuntonan di hende muhe den un forma mas amplio. Mi a haya e encuentro importante tambe pasobra den dialogo cu otro den un ambiente mas relaha y un setting mas chikito bo ta haci pregunta y bisa cosnan mas facil cu si bo ta den un sala yen di hende.”