You are here

  • Sharebar

Prome Bishita Den Programa Di Aruba Learning Event Na Parke Solar Na Aeropuerto Internacional Reina Beatrix

Prome Bishita Den Programa Di Aruba Learning Event Na Parke Solar Na Aeropuerto Internacional Reina Beatrix

ORANJESTAD -- E prome bishita di reconocemento cu participantenan di Aruba Learning Event a realisa dialuna mainta tabata na e Parke Solar na Aeropuerto International Reina Beatrix.

Aki un delegacion di Aruba Airport Authority N.V., encabesa pa CEO James Fazio a ricibi e grupo expresando palabra di bon bini y tambe con orguyoso e entidad ta sinti di por ta sede di un di e proyectonan di sostenibilidad na Aruba.

Den presencia di Minister di Asuntonan Economico, Comunicacion, Energia y Medio Ambiente Mike de Meza  y director di N.V. Elmar, Robert Henriquez, a ofrece un presentacion caminda a actualisa riba e progreso haci desde e ultimo evento di Green Conference na October 2014.

Elton Lampe, Business Development Officer of N.V. Elmar a splica na esnan presente cu apesar cu e clima tabata uno hopi nubla den dia di ayera, toch e parke solar ta keda produci energia cu e rayonan di solo cu ta pasa dor. Completa na luna di maart ultimo cu e finalisacion di e di dos fase, e parke solar tin un capacidad total di 3.47 Mhw.

E factor cu no solamente ta un instalacion pa genera coriente pa medio di energia solar, pero tambe ta funciona como garashi publico, ta haci di dje un di e proyectonan mas grandi den Caribe. Participantenan di e Aruba Learning Event ta consisti di funcionario, ingeniero y ehecutivonan publico di diferente nacion y entidad rond mundo. Nan ta na Aruba pa dos dia y asina conoce mas di cerca e iniciativa y avancenan realisa dor di nos isla den e meta pa sostenibilidad total.

E bishita na Parke Solar na Aeropuerto International Reina Beatrix tabata djis un punto den e programa di e dia di ayera cu a inclui tambe Parke di Molina di Biento na Vader Piet, Planta di WEB Aruba N.V. y tambe e sede di MFA na Noord, como ehempel di edificio publico cu ta auto sostenibel pa medio di panelnan solar y ta aporta na e produccion nacional di energia renobabel.