You are here

  • Sharebar

Kambia Sistema Di Belasting Riba Entrada Mundial Pa Un Regimen Di Belasting Teritorial

Alex Rosaria (Partido PAIS)

WILLEMSTAD (PAIS) -- Aktualmente Kòrsou ta apliká e sistema di belasting di entrada mundial. Esaki kier men si por ehèmpel tin un Hapones ta biba i tin negoshi aki na Kòrsou i tambe na Hapon, segun nos sistema e mester paga belasting na Kòrsou riba su entrada na Kòrsou, pero tambe paga belasting na Kòrsou di su entrada na Hapon.

Riba esaki na Hapon tambe e ta paga belasting riba su entrada na Hapon.

Alex Rosaria, lider polítiko di Partido PAIS den un dokumento ekstenso ku ta disponibel riba www.partidopais.wordpress.com/2015/09/10/the-case-for-a-territorial-tax-... ta argumentá ku mester kita for di e sistema di belasting di entrada mundial i bai pa un régimen teritorial di impuesto pa Kòrsou. Den e kaso aki tur hende ku ta biba na Kòrsou ta paga belasting di entrada solamente riba entrada aki na Kòrsou. Den e ehèmpel ariba menshoná, e Hapones ta paga belasting aki na Kòrsou riba su entrada na Kòrsou i no riba su entrada na Hapon.

Hopi pais na mundu ku tin e sistema belasting di entrada mundial ta evitá e desbentahanan di esaki dor di sera tratadonan fiskal pa evitá pagamentu di belasting dòbel. Tin pais hopi eksitoso den esaki. Hulanda mes ta unu ku tin kasi 80 tratado.

Esaki ta hasi Ulanda atraktivo pa invershonistanan. Kòrsou tin apénas 2 di e tipo di tratadonan fiskal aki. Perspektiva ku Kòrsou lo yega na un netwerk supstansial di tratado pa evitá belasting dòbel ta hopi abou. Den e pensamentu di Rosaria ta sentral ku si ta improbabel pa sera hopi tratado fiskal pa evitá pago dòbel di belasting, dikon no kambia e sistema i hasié un régimen teritorial di impuesto. Un régimen teritorial di impuesto ta igual na tin tratado pa evitá dòbel belasting ku delaster un pais na mundu. Kòrda ku sera un tratado ta un proseso largu ku no ta dependé di Kòrsou so, sino tambe di esun ku kende bo ke sera un tratado.

Ku un régimen teritorial di impuesto nos pais ta bira muchu mas atraktivo pa invershon di afó. Paisnan ku tin e sistema aki ta entre otro Dubai, Hong Kong, Chile i Singapore. Tur ta paisnan sumamente eksitoso. En kombinashon ku e “investor’s permit” di minister Nelson Navarro, ku ta hustamente pa akomodá empresarionan di buena fe, ku hopi kapital ku ke invertí i alabes establesé na Kòrsou, nos pais lo bira muchu mas atraktivo pa invershon i kreashon di kupo di trabou.

E régimen di impuesto teritorial no ta perfekto pero esun mundial tampoko no ta perfekto. E pregunta si Kòrsou ke sali for di su zona di kòmfòr i analisá e modelo aki seriamente. Rosaria ta rekomendá pa tantu sektor priva i Gobièrnu analisá seriamente e proposishon aki.