You are here

  • Sharebar
Inisiativa PAIS A Bira Realidat

Afpak Team Curaçao A Kuminsá Hasi Su Trabou

WILLEMSTAD (PAIS) -- Partido PAIS a tuma nota ku e asina yama Afpak Team Kòrsou a kuminsá funshoná.

Afpak team ta un ekipo multidisiplinario ku ta atendé ku e kriminal di tal manera ku ta kita tur pertenensia ku e kriminal a yega n’e via di aktividatnan kriminal. Di e manera aki bo ta dal e kriminal kaminda ta hasi doló, esta den su pòtmòni. Den pasado muchu a konsentrá kasi solamente riba e aspekto di kue e kriminal i ser’é den prison sin ku ta mishi ku e pertenensia prosedente di su aktonan kriminal. Na nos opinion esaki no tabata e manera mas efektivo pa kombatí kriminalidat. Ta konosí ku 90% di kriminalidat tin komo motibu prinsipal, plaka.

E idea di Afpakteam a nase na 2013 serka Alex Rosaria, lider polítiko di PAIS, ku a mira kon e ekiponan aki ta funshoná den otro pais. Ougùstùs e Afpak Team a bira un realidat aki na Kòrsou i resientemente e a kuminsá ku akshonnan kitando plaka, boto i outo luho for di kriminalnan. E idea ta pa bende e merkansia i pa e plaka bai Fondo di Kriminalidat ku na su turno mester bai pa proyektonan pa kombatí i prevení kriminalidat.

Hinter e idea di Afpak Team tambe tin ke ber ku nos sentido di hustisia. Nos ta kere ku tur hende mester yega na su kosnan dor di trabou i esfuerso honesto i no dor di kriminalidat.

Nos ta deseá e Afpak Team hopi éksito i ta spera ku esaki por konta ku sosten di nos pueblo.