You are here

  • Sharebar
Kier sa si tin interes local pa desaroya e edificio den un restaurant.

Aruba Airport Authority Evaluando Oportunidad Pa Desaroya “Aeropuerto Dakota”

Aruba Airport Authority Evaluando Oportunidad Pa Desaroya “Aeropuerto Dakota”
Barbara Brown, Chief Commercial Officer na Aruba Airport Authority N.V.

ORANJESTAD (AAA) -- Recientemente Aruba Airport Authority N.V. (AAA) a anuncia publicamente cu nan ta buscando pa sa si tin interes for di sector priva pa un proyecto masha special y hopi sentimental.

Nan preferencia ta si por logra haya un compania interesa na Aruba mes. Barbara Brown, Chief Comercial Officer di AAA a anuncia cu ta buscando un inversionista cu kier ta parti di e proceso di rescate di un di e monumentonan mas importante den historia di Aruba y un di e simbolo, actor y testigonan principal di nacemento y desaroyo di e industria di turismo cu tanto Aruba ta orguyoso di dje. “Aeropuerto Dakota ta e parti mas historico di e mundo di aviacion di Aruba”, asina Barbara Brown a expresa.

A construi e terminal “Dakota” na aña 1942. E ta situa na e parti panort di e pista actual di aeropuerto. Den añanan 1950, cu construccion di e “schelp” na e parti panort, cu actualmente ta e edificio di “Yegada” di aeropuerto, e terminal bieu Dakota a bira e departamento di Brandweer. Den transcurso di añanan, a uza e edificio pa trabaonan di mantencion di avionnan chikito y despues di algun aña a sey’e y inclui’e den e cura di aeropuerto pa proteg’e miho.

AAA a publica un aviso, den forma di un “Request for Expression of Interest”, pa invita inversionistanan y/of desaroyadornan interesa pa presenta nan mes. Entre esunnan cu demostra interes lo organisa un destaho y for di eynan lo cuminsa e proceso di rescate y revitalisacion di e terminal Dakota. AAA ta determina pa preserva e parti importante aki di historia di Aruba.

Barbara Brown a splica cu AAA ta buscando e organisacion cu e mesun vision cu AAA, esta pa trece aviacion atrobe mas cerca di comunidad pa medio di un Café/Restaurant basa riba e tema “aviacion”, desaroya pa e inversionista interesa, na su propio gusto. E café/restaurant no lo keda den e cura di aeropuerto, pero e area lo wordo habri bek pa ofrece publico general acceso completo.

E ta añadi cu e idea ta pa e inversionista traha hunto cu AAA y Monumentenburo riba preservacion di e edificio. E terminal Dakota tin un estilo “Art Deco”, cu dos luifel dilanti y un trapi pa bay riba e dak na banda. Esakinan ta elemento cu AAA lo kier mira preserva. Tambe Monumentenburo lo asisti den guia con pa anda cu un monumento y su diseño na e forma cu ta mantene e integridad y balor historico di e edificio.

E café/restaurant aki tin un di e miho bistanan di e pista completo di aeropuerto y ta unda cu clientenan, tanto local como turista por sinta y disfruta di algo di come y bebe den un bon ambiente y un bista fabuloso.

Inversionistanan interesa den un proyecto historico y pa ta un actor importante den e proceso pa salvaguardia un monumento berdaderamente unico cu un historia sumamente rico, por tuma contacto cu Aruba Airport Authority en conexion cu e “Request for Expression of  Interest”.