You are here

  • Sharebar

Lantamentu Ofisial Di Partido Un Kòrsou Hustu Riba Dia Internashonal Di Demokrasia

Omayra Leeflang, Lider polítiko di Un Kòrsou Hustu
Lantamentu Ofisial Di Partido Un Kòrsou Hustu Riba Dia Internashonal Di Demokrasia

WILLEMSTAD -- Dia 15 di september, fundadonan di paritdo Un Kòrsou Hustu a skohe pa lantamentu ofisial di e partido.

15 di september ta dia internashonal di demokrasia, dekreta na 2007 pa Nashonan Uni.  Dia Internashonal di Demokrasia ta duna oportunidat pa evaluá e estado di demokrasia den mundu.

Kiko ta demokrasia

Demokrasia ta un proseso pero tambe un meta. Ta solamente ku partisipashon di kompleto I sosten di komunidat internashonal, gobièrnunan nashonal di paisnan, komunidat I individuonan, e ideal di demokrasia por bira un realidat ku tur hende por partisipá na dje tur kaminda.

Demokrasia na Korsou na peliger

Últimamente demokrasia na Kòrsou ta na peliger. Esaki nos por detektá for di e manera ku mas i mas komunidat ta alehá for di polítika i un falta di interes pa bai vota. Ademas nos a eksperensia un komersialisashon di polítika. Ta parse manera elekshon a bira un asuntu di plaka pa sirbi esun ku tin plaka òf un asuntu di partido polítiko pa sirbi interes di esnan ku ta sostené e partido polítiko. Finalmente mester menshoná tambe e echo ku pueblo ta vota anto despues ta un gobièrnu di eksperto ta sinta. Pues pueblo no ta rekonosé su voto mas.

Demokrasia su ideal ta basa riba e prinsipio: Government for the people by the people, pues for di pueblo gobièrnu ta haña e mandato i pa pueblo gobièrnu mester uza e mandato.

Partido Un Kòrsou Hustu

Partido Un Kòrsou Hustu a skohe e fecha di 15 di sèptèmber pa lansa e partido ofisialmente pasobra e partido ta para tras di e prinsipionan di demokrasia: esta libertat, rèspèt pa derecho humano, elekshon liber i sekreto i partisipashon di tur hende tambe despues di elekshon.

Un Kòrsou Hustu, ta para pa Un Kòrsou kaminda derechi di tur hende ta konta.  Nos a demostrá ku por lanta un partido polítiko ku un vishon pa pueblo riba nos propio forsa finansiero.

Djamars dia 15 di sèptèmber pueblo kompletu ta keda invitá pa bin sera konosí ku sede di partido Un Kòrsou Hustu, e 10 fundadornan di partido i direktiva di Partido, durante un happy hour mitar di seis di atardi. Lo tin un sòpi krioyo pa tur bishitante.

E Sede di partido Un Korsou Hustu,  ta keda dilanti bario di Brievengat nèt despues di e hanchi di Schelpwijk, den kaminda grandi, kaminda tin e bandera grandi di partido Un Kòrsou Hustu.