You are here

  • Sharebar
Cu ayudo di Lotto.

Kamilah Dammers Ta Cla Pa Hunga Su Di Dos Torneo Profesional Den Bowling

Kamilah Dammers Ta Cla Pa Hunga Su Di Dos Torneo Profesional Den Bowling

ORANJESTAD -- Despues di a hunga su prome torneo profesional den PWBA unda e la obtene un di 7 luga overall den 80 bolichera esaki na Topeka Open na Kansas, e atleta Kamilah Dammers awo ta cla pa un otro torneo profesional un di esunnan mas grandi cu ta e US Woman’s Open na New Jersey.

Mester bisa cu durante di e US Woman’s Open, e bolichera Dammers lo hunga un total di 3 dia di clasificacion y despues lo bini 2 dia di match play caminda e miho hungadonan lo sigui pa e rond final. Den su prome torneo e bolichera Dammers a hunga un total di 30 wega cual ta un experiencia nobo mirando e cantidad grandi di wega cu e hungado Arubano no ta custuma cune. Manera e la a termina cu su estudio na Orlando, Florida e bolichera Kamilah Dammers a wordo acepta pa hunga e tour profesional di bowling femenino cu ta e PWBA. E tour profesional PWBA ta conta cu un total di 11 torneo rond Merca y mayoria hungado ta di nacionalidad Mericano. E otro representacion ta bini di entre otro Colombia, Mexico, Republica Dominicana, Venezuela y Aruba.

Despues di a gana e medaya di oro y plata den e Weganan Centro Americano y del Caribe na Veracruz, Mexico, e bista riba e bolichera Arubano a bira grandi unda dos patrocinado a acerca  pa yuda cu uniform y bala, esakinan ta t-shirt sponser di Infusion y bala di sponsor Hammer.

Un danki sigur na Lotto, e Loteria di Aruba pa medio di Comision di Subsidio cu a yuda subsidia e biahe di e bolichera Kamilah Dammers pa e US Woman’s Open na New Jersey, Merca.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.