You are here

  • Sharebar

Gregory Elias Ta Anunsiá Ku Pa CNSJF 2016 Ya Tin Un Evento Históriko Prepará

Gregory Elias Ta Anunsiá Ku Pa CNSJF 2016 Ya Tin Un Evento Históriko Prepará
Farley Lourens huntu ku Gregory Elias.
(Media credit: Farley Lourens)
Fechanan Pa CNSJF 2016: 1, 2 i 3 Di Sèptèmber

WILLEMSTAD (CSN) --  Djaweps anochi 27 di ougùstùs, a tuma lugá e ya tradishonal Happy Hour previo na e siman di Curaçao North Sea Jazz Festival. Ku evento aki Fundashon Bon Intenshon i Mojo Events, ta trese huntu representantenan di medionan di prensa lokal i tambe invitadonan spesial di e organisadónan. Durante di e enkuentro aki e FBI i Mojo Events a yama danki un biaha mas pa aporte ku nan ta risibí di komunidat di Kòrsou. Alabes a anunsiá informashon di último ora i tambe algun detaye importante pa tene kuenta kuné e fin di siman di ku di CNSJF.

Manera tabata e kaso na okashonnan anterior e organisadónan a mustra ku ta pa medio di un esfuerso konhunto a logra ku último sinku aña e festival tabata un éksito. “Danki na e sosten riba kua nos por a konta kuné e aña aki tambe, nos tin sigur ku e di 6 edishon di CNSJF lo bira unu grandi i memorabel,”  Sr Gregory Elias a bisa. E empresario i u rim no ta spar ningun esfuerso pa tur aña realisá un festival di taya mundial. “Nos ta hasi esaki pa e amor ku nos tin pa músika i mas ku tur kos pa e amor grandi ku e tin pa Kòrsou,” Elias a sigui bisa.

Mas aleu e inisiadó di Fundashon Bon Intenshon a bisa ku nan di FBI no por realisá e evento sin e ekipo di profeshonal ku ta asisti nan tur aña. “Ku esaki mi ke enfatisá muy en especial  riba e balor agregá di e profeshonalnan ku Mojo Events di HUlanda ta envolví den e proyekto, sin ke kita ningún mérito for di nos profeshonalnan lokal.” 

Un notisia alentador ku sr. Elias a kompartí ku esnan presente ta ku pa e djaweps anochi di CNSJF 2016, FBI a traha riba un evento hopi grandi. Pa nos sita sr. Elias su palabranan; “we are going to kick some butts’.  Konosiendo e empresario aki, i teniendo kuenta ku kosnan realmente grandi FBI  a realisá den e edishonnan anterior di CNSJF, nos ta pensa ku mundo lo mester fèrwagt un evento históriko pa 2016. Sr. Elias a primintí ku pa fin di sèptèmber lo e duna lus bèrdè pa anunsiá kiko e eventonan di djaweps 1 di sèptèmber 2016 lo enserá. “Esaki despues ku nos resolvé algun reto di índole tékniko. Nos ta trahando duru riba esakinan.”

Un petishon spesial Sr. Elias tabatin na pueblo di Kòrsou pa kumpra karchi pa eksperensiá e konsierto di The Blind Boys of Alabama, ku lo tuma lugá djarason 2 di sèptèmber na Brakapoti Mei-Mei.   E agrupashon aki ta konsistí di músiko i kantantenan siegu.  E agrupashon ya 44 aña ta tour rònt mundu. Lo hasi un donashon na Fundashon Pro Bista ku parti di fondonan rekoudá ku e konsierto. Pues aparte ku pa un suma hopi abou por gosa di bon músika, bishitantenan na e konsierto di dia 2 di sèptèmber ta kontribuí ku ‘Fundashon Pro Bista’.

E ambiente di e Happy Hour tabata ameno. Nos VJ lokal Ian Sillie a pasa algun video di e artistanan ku ta na kaminda pa CNSJF 2015 pa hinka tur hende den e esfera di festival . Por a sinti kla ku e keintura a kuminsá subi den e área di Parassasa. -- www.curacaonorthseajazz.com