You are here

  • Sharebar

Awe 11 Di Augustus Ta Recorda E Culminacion Di Tur E Accionnan Durante E Augustus Scur Di 1977

Awe 11 Di Augustus Ta Recorda E Culminacion Di Tur E Accionnan Durante E Augustus Scur Di 1977

ORANJESTAD (MEP) -- E luna aki, esta augustus 2015 nos ta recorda cu 38 aña pasa nos pueblo den forma decidido a lanta para pa defende cu alma y curpa su autonomia, su libertad.

Historia ta demostra cu den e eleccion di Staten di dia 17 di juni 1977 partido MEP a gana den forma aplastante obteniendo 5 di e 8 asientonan y cu esaki  e pueblo Arubano a ratifica e mandato na MEP pa sigui cu e lucha pa libertad di e pueblo aki. Despues di e victoria aplastante aki ningun hende na Aruba por a imagina loke ta bay sosode. E formador di Gobierno Central, sr. Boy Rozendal a maniobra di tal forma pa laga e partido mayoritario MEP for di gobierno, esta sin respeta e decision di e electorado Arubano.

Principio Y Prestigio

Pueblo di Aruba, mirando cu un partido di 1 asiento a drenta gobierno  Antiyano cu cooperacion di otro partidonan di otro islanan di Antiyas y lagando MEP completamente afor, a dicidi bao guia di Betico Croes hunto cu Gobierno Insular y gremionan pa lanta , protesta  y pa respeta nos electorado Arubano. “MEP ta un partido di principio y prestigio cu no ta bay mendiga pa drenta gobierno. Entrante dialuna accionnan lo cuminsa. Lo bay tin escalacion di e accionnan, cual lo por desemboca den un independencia total di Aruba”, tabata palabranan fuerte y decidido di nos Libertador e tempo ey.

Riba un dia manera awe 11 augustus, 38 aña pasa, sindicatonan den gran mayoria a pone trabao abao y a subi caya, unda e sindicato di WEB tambe a notifica gobierno cu lo bay kita coriente y consecuentemente esey a trece problema pa suministro di awa. Riba e dia aki coriente a cay afor y henter nos comunidad a keda den scuridad total. E tension a sigui crece y pa dianan largo Aruba tabata paraliza.

Riot Comando For Di Curaçao

Dos sindicalista, esta Presidente di IOWUA, sr. Chinto Geerman (q.e.p.d.) y sr. Juan Yarzagaray a ser encarcela.pa motibo di un pamfleta cu nan a saca dia 9 di augustus. Pueblo tabata decidido. Despues di un reunion di MEP na Centro di Bario Noord, a dicidi cu lo bay Warda di Polis na Playa pa exigi libertad di e sindicalistanan aki. Hendenan tabata furioso y tabata tira piedra riba e polisnan. Despues a bay protesta dilanti cas di Officier van Justitie Arps cu a bay baha bandera di Aruba cu tabata bula dilanti Bestuurskantoor. Mas laat den anochi a baha un avion yena cu Riot Comando for di Curaçao bao guia di Castillejo Cova cu a bin marcha den cayanan di Oranjestad pa mustra nan poder. Durante e protestanan dilanti Bestuurskantoor balanan cayente a cay, a tira riba e jeep di Betico Croes y tambe varios persona a wordo herida y e mesun anochi ey polis a distrui un auto Volkswagen cu dos ciudadano aden banda di Wilhelminastadion. Na Aeropuerto e avion cu a trece e Riot Comando na promer instante  no por a baha, pasobra a blokia e pista cu e autonan di Cuerpo di Bombero, consecuentemenrte e avion mester a bolbe subi pa evita cu cosnan grave lo a sosode. Den tur e acontecimentonan aki e mayornan di Betico Croes a ser humilia, su primo y diferente otro personanan a ser herida y diferente lider di bario a ser persigui.

Hulanda A Habri Porta

Sinembargo e gran mayoria di pueblo no a sucumbi pa tur e intimidacionnan aki y den forma decidido a sigui lucha pa salba su honor y dignidad. Locual cu a sigui despues di tur e accionnan aki ta cu sindicatonan hunto cu politiconan a tene un reunion na Surfside, unda a dicidi cu a base di articulo 26 di Eilandenregeling lo bay manda un delegacion Hulanda. Finalmente gobierno di Hulanda a habri porta y a dicidi pa acepta un delegacion Arubano pa delibera tocante e futuro estatal di Aruba.

Esaki ta en breve locual a sosode durante Augustus Scur na 1977 y cu ta bay den historia como un periodo determinante den e lucha di e pueblo pa su libertad. Ta danki na e accionnan aki awe Aruba ta goza di su Status Aparte, esta un pais autonomo den Reino Hulandes.

Ta pesey, laga e dia di awe ta un dia di reflexion pa un y tur den e pais aki gara e bandera y sigui lucha pa conserva  nos libertad cu a ser logra a base di sanger, sodor y lagrima.